నిజమైన బందిపోటుతో మనోజ్ బాజ్‌పేయి.. వైరల్ అవుతున్న పాత వీడియో

జాతీయ అవార్డు గ్రహీత, ప్రముఖ నటుడు మనోజ్ బాజ్‌పేయి గతంలో ఓ నిజమైన బందిపోటుతో గడిపిన అనుభవాన్ని పంచుకున్న వీడియో ఒకటి ఆన్‌లైన్‌లో మళ్లీ చక్కర్లు కొడుతోంది. 'ది కపిల్ శర్మ షో'కు సంబంధించిన ఈ క్లిప్‌లో ఆయన ఆసక్తికర విషయాలను వెల్లడించాడు. ఈ షోలో కపిల్ శర్మ.. మీరు ఎప్పుడైనా నిజమైన బందిపోటును కలిశారా? అని అడగ్గా, మనోజ్ తన పాత జ్ఞాపకాలను గుర్తుచేసుకున్నాడు.

'బాండిట్ క్వీన్' సినిమా షూటింగ్ సమయంలో ఈ సంఘటన జరిగిందని మనోజ్ బాజ్‌పేయి తెలిపాడు. ఆ చిత్రంలో దొంగ మాన్‌సింగ్ పాత్ర కోసం సిద్ధమయ్యేందుకు, అసలైన మాన్‌సింగ్‌ను గమనించి అతడి గురించి తెలుసుకోవాలని దర్శకుడు శేఖర్ కపూర్ తనకు సూచించినట్లు ఆయన చెప్పాడు. షూటింగ్ సమయంలో మాన్‌సింగ్ తనతో పాటే ఉండేవాడని మనోజ్ అన్నాడు.

షూటింగ్ పూర్తయ్యాక, చీకటి పడిన తర్వాత మాన్‌సింగ్ తమతో పాటు కారులో ప్రయాణించేవాడని మనోజ్ తెలిపాడు. ఆ సమయంలో అతను ఎప్పుడూ సాధారణంగా కూర్చోలేదని, చాలా అప్రమత్తంగా ఉంటూ డ్రైవర్‌కు "వేగంగా పో... నెమ్మదిగా వెళ్ళు..." అంటూ సూచనలు ఇచ్చేవాడని చెప్పాడు. ఎందుకలా అని అడిగితే, "పాత పగ ఎప్పుడైనా దాడి చేయొచ్చు" అని మాన్‌సింగ్ సమాధానమిచ్చినట్లు మనోజ్ బాజ్‌పేయి వివరించాడు.

ఫూలన్‌దేవి జీవితం ఆధారంగా తెరకెక్కిన 'బాండిట్ క్వీన్' చిత్రంలో సీమా బిశ్వాస్ ప్రధాన పాత్ర పోషించారు. ఈ సినిమాలో మనోజ్ బాజ్‌పేయి మాన్‌సింగ్ పాత్రలో కనిపించాడు. ఈ సినిమా విమర్శకుల ప్రశంసలు అందుకున్నప్పటికీ, అందులోని కొన్ని తీవ్రమైన సన్నివేశాల కారణంగా వివాదాల్లో చిక్కుకుంది.