సొంత పార్టీపై కాంగ్రెస్‌ సీనియర్‌ నేత చిన్నారెడ్డి సంచలన ఆరోపణలు!

కాంగ్రెస్‌ సీనియర్‌ నేత చిన్నారెడ్డి సంచలన వ్యాఖ్యలు చేశారు. గత ఎన్నికల్లో తనకు టికెట్‌ రాకపోవడానికి డబ్బు కారణమని ఆరోపించారు. వనపర్తిని సర్వనాశనం చేస్తున్నారని ఆవేదన వ్యక్తం చేశారు. తాను అన్నీ భరిస్తూ పార్టీలో కొనసాగుతున్నానని చెప్పారు. లేదంటే మరో జీవన్‌రెడ్డిలా పార్టీకి దూరమయ్యేవాడినని వ్యాఖ్యానించారు. కాంగ్రెస్‌లో కొన్ని తప్పులు జరుగుతున్నాయని అన్నారు. పార్టీకి అన్యాయం చేస్తున్న వారిని బయటకు పంపిస్తామని స్పష్టం చేశారు.

45 ఏళ్లుగా కాంగ్రెస్‌ పార్టీ నిర్మాణం కోసం తాను ఎంతో కష్టపడ్డానని చిన్నారెడ్డి చెప్పారు. పార్టీ జెండాను ఎప్పుడూ మోయని వారికి టికెట్లు ఇచ్చారని ఆరోపించారు. గతంలో కాంగ్రెస్‌లో ఉండి తర్వాత బీఆర్‌ఎస్‌లో చేరినవారు.. అక్కడ సంపాదించుకుని తిరిగి కాంగ్రెస్‌లోకి వచ్చారని అన్నారు. అలాంటి వారికి మళ్లీ టికెట్లు ఇవ్వడం సరికాదని అభిప్రాయపడ్డారు. ‘ఇదా కాంగ్రెస్‌ పార్టీ? ఇదా రాజకీయం?’ అంటూ ప్రశ్నించారు.

తాను ఎమ్మెల్యేగా గెలిచి రాష్ట్ర ప్రభుత్వంలో మంత్రిగా ఉండి ఉంటే వనపర్తికి మహర్దశ వచ్చేదని చిన్నారెడ్డి అన్నారు. తనకు అవకాశం ఇచ్చి ఉంటే నియోజకవర్గాన్ని మరింత అభివృద్ధి చేసేవాడినని చెప్పారు. ప్రస్తుతం జరుగుతున్న పరిణామాలు తనను తీవ్రంగా బాధిస్తున్నాయని తెలిపారు.

అయితే కాంగ్రెస్‌ పార్టీని వీడే ప్రసక్తే లేదని చిన్నారెడ్డి స్పష్టం చేశారు. పార్టీలోనే ఉంటూ తప్పులను ప్రశ్నిస్తానని చెప్పారు. కాంగ్రెస్‌కు అన్యాయం చేసే వారిని బయటకు పంపిస్తామని హెచ్చరించారు.