జిమ్‌ చేస్తున్నారా? హెల్తీగా తింటున్నారా? అయినా హార్ట్‌ ఎటాక్‌ రావొచ్చు.. కారణమేంటంటే!

జిమ్‌కు వెళ్తున్నారు.. క్రమం తప్పకుండా వ్యాయామం చేస్తున్నారు.. ఆరోగ్యకరమైన ఆహారం తీసుకుంటున్నారు.. బరువు కూడా అదుపులోనే ఉంది. మరి గుండెకు ఎలాంటి ప్రమాదం ఉండదని అనుకుంటున్నారా? అది పూర్తిగా నిజం కాదు. బయటికి ఎంతో ఫిట్‌గా కనిపించే వ్యక్తుల్లోనూ గుండెపోటు వచ్చే ప్రమాదం ఉంటుంది. ఇందుకు ప్రధాన కారణాల్లో ఒకటి.. శరీరంలో నిశ్శబ్దంగా పెరిగే అధిక కొలెస్ట్రాల్‌!

భారత్‌లో ముఖ్యంగా యువతలో గుండెపోటు కేసులు పెరుగుతున్నాయన్న ఆందోళన వ్యక్తమవుతోంది. సాధారణంగా అధిక బరువు, వ్యాయామం లేకపోవడం, ధూమపానం వంటి వాటినే గుండెపోటుకు ప్రధాన కారణాలుగా భావిస్తాం. అయితే ఫిట్‌నెస్‌ ఒక్కటే గుండె ఆరోగ్యానికి పూర్తి రక్షణ ఇవ్వదని నిపుణులు చెబుతున్నారు.

ఫిట్‌గా ఉన్నా.. గుండెకు ముప్పు ఎలా?
ఓ 44 ఏళ్ల వ్యక్తిని ఉదాహరణగా తీసుకుంటే.. అతను క్రమం తప్పకుండా హాఫ్‌ మారథాన్‌లో పాల్గొనేవాడు. ఆరోగ్యకరమైన ఆహారం తీసుకునేవాడు. ధూమపానం చేసేవాడు కాదు. బరువు కూడా సాధారణంగానే ఉండేది. అయితే పరుగెత్తుతున్న సమయంలో ఛాతిలో అసౌకర్యం కలగడంతో వైద్యులను సంప్రదించాడు. సాధారణ పరీక్షల్లో పెద్దగా సమస్య కనిపించలేదు. కానీ రక్త పరీక్షలో ఎల్‌డీఎల్‌ కొలెస్ట్రాల్‌ 190 mg/dLగా తేలింది. తదుపరి పరీక్షల్లో గుండెకు రక్తాన్ని సరఫరా చేసే ధమనుల్లో ఏకంగా 90 శాతం బ్లాకేజీ ఉన్నట్లు గుర్తించారు. చివరకు అతనికి యాంజియోప్లాస్టీ చేయాల్సి వచ్చింది.

కొలెస్ట్రాల్‌ అంటే లావు మాత్రమే కాదు!
కొలెస్ట్రాల్‌ గురించి చాలామందిలో ఒక అపోహ ఉంది. శరీరంలో కొవ్వు ఎక్కువగా ఉంటేనే కొలెస్ట్రాల్‌ పెరుగుతుందని భావిస్తారు. కానీ అది నిజం కాదు. కొలెస్ట్రాల్‌లో ఎక్కువ భాగాన్ని మన శరీరమే, ముఖ్యంగా కాలేయం, ఉత్పత్తి చేస్తుంది. అందువల్ల సన్నగా ఉన్నవారిలోనూ కొలెస్ట్రాల్‌ స్థాయులు ప్రమాదకరంగా పెరగవచ్చు.

ముఖ్యంగా ఫ్యామిలియల్‌ హైపర్‌కొలెస్టెరోలీమియా వంటి జన్యుపరమైన పరిస్థితులు ఉన్నవారిలో మంచి ఆహారం తీసుకున్నా, రోజూ వ్యాయామం చేసినా ఎల్‌డీఎల్‌ స్థాయులు అధికంగా ఉండొచ్చు.

అసలు ప్రమాదం ఏంటంటే..
అధిక కొలెస్ట్రాల్‌ను ‘సైలెంట్‌ కిల్లర్‌’ అని ఎందుకు అంటారు. అది పెరుగుతున్నప్పుడు సాధారణంగా ఎలాంటి స్పష్టమైన లక్షణాలు కనిపించవు. రక్తంలో అధికంగా ఉన్న ఎల్‌డీఎల్‌ కొలెస్ట్రాల్‌ క్రమంగా ధమనుల గోడల్లో పేరుకుపోతుంది. కాలక్రమంలో అక్కడ ఫ్లాక్‌ ఏర్పడి రక్తనాళాలను ఇరుకుగా చేస్తుంది. గుండెకు రక్త సరఫరా తగ్గే వరకు చాలామందికి తమ శరీరంలో ఏం జరుగుతుందో తెలియకపోవచ్చు.

ఛాతినొప్పి, శ్వాస తీసుకోవడంలో ఇబ్బంది, అసాధారణ అలసట వంటి లక్షణాలు కనిపించే సమయానికి సమస్య ఇప్పటికే ముదిరి ఉండొచ్చు. కొందరిలో అయితే హార్ట్‌ ఎటాక్‌ రావడమే మొదటి హెచ్చరికగా మారుతుంది.

భారతీయులకు మరింత జాగ్రత్త అవసరం
భారతీయుల్లో ఇతర పాశ్చాత్య జనాభాతో పోలిస్తే తక్కువ వయసులోనే కరోనరీ ఆర్టరీ వ్యాధులు వచ్చే అవకాశం ఉందని నిపుణులు చెబుతున్నారు. అందుకే చిన్న వయసులో ఉన్నాం, ఫిట్‌గా ఉన్నాం, జిమ్‌ చేస్తున్నాం కాబట్టి గుండె విషయంలో ఎలాంటి పరీక్షలు అవసరం లేదనుకోవడం సరికాదు. ముఖ్యంగా కుటుంబంలో చిన్న వయసులోనే గుండెజబ్బులు వచ్చిన చరిత్ర ఉంటే మరింత అప్రమత్తంగా ఉండాలి.

30 ఏళ్లకే కొలెస్ట్రాల్‌ పరీక్ష?
నిపుణుల సూచన ప్రకారం  కొలెస్ట్రాల్‌ స్థాయులను చిన్న వయసులోనే పరీక్షించుకోవడం మంచిది. సాధారణ లిపిడ్‌ ప్రొఫైల్‌ ద్వారా ఎల్‌డీఎల్‌, హెచ్‌డీఎల్‌,  ట్రైగ్లిజరైడ్స్‌ వంటి ముఖ్యమైన వివరాలు తెలుసుకోవచ్చు. అవసరాన్ని బట్టి వైద్యులు లైపోప్రొటీన్‌(a), ApoB, ఎల్‌డీఎల్‌ పార్టికల్‌ టెస్టింగ్‌, సీఏసీ స్కోరింగ్‌ వంటి అదనపు పరీక్షలను సూచించవచ్చు. ముఖ్యంగా కుటుంబ చరిత్ర, వయసు, ఇతర ఆరోగ్య పరిస్థితులను బట్టి ఏ పరీక్ష అవసరమో వైద్యుడే నిర్ణయించాలి.

వ్యాయామం ఆపేయాలా? అస్సలు కాదు!
అధిక కొలెస్ట్రాల్‌ ప్రమాదం ఉందని తెలుసుకున్నంత మాత్రాన వ్యాయామాన్ని ఆపేయాల్సిన అవసరం లేదు. వ్యాయామం, సమతుల ఆహారం, సరైన బరువు.. ఇవన్నీ గుండె ఆరోగ్యానికి  ముఖ్యమైనవే. అయితే అవి మాత్రమే సరిపోవు. వాటితో పాటు క్రమం తప్పకుండా ఆరోగ్య పరీక్షలు చేయించుకోవడం కూడా అవసరం. బయటికి కనిపించే ఫిట్‌నెస్‌ మన ఆరోగ్యానికి ఒక భాగం మాత్రమే. రక్తంలో దాగి ఉన్న కొలెస్ట్రాల్‌ స్థాయులు కూడా తెలుసుకోవాలి.

గమనిక: ఈ సమాచారం కేవలం అవగాహన కోసం మాత్రమే. వైద్య సలహాకు ప్రత్యామ్నాయంగా భావించొద్దు. ఎలాంటి ఆరోగ్య సమస్యలున్నా వైద్యులను సంప్రదించాలి.