'ఆపరేషన్ దేవేంద్ర'తో ఫడ్నవీస్కు చెక్ పెట్టేందుకే!: అమిత్ షాపై ఉద్ధవ్ ఠాక్రే సంచలన ఆరోపణ
- ఎంపీల ఫిరాయింపు వెనుక కేంద్రమంత్రి అమిత్ షా హస్తం ఉందన్న ఉద్ధవ్
- ప్రధాని రేసులో ఫడ్నవీస్ ఉండకూడదనే ఈ వ్యూహం అని ఆరోపణ
- హింగోలి సభలో కేంద్రంపై తీవ్ర విమర్శలు చేసిన ఠాక్రే
భారీ కుట్ర దాగి ఉందని శివసేన (యూబీటీ) అధ్యక్షుడు ఉద్ధవ్ ఠాక్రే సంచలన ఆరోపణలు చేశారు. ఇది మహారాష్ట్ర ముఖ్యమంత్రి దేవేంద్ర ఫడ్నవీస్ను లక్ష్యంగా చేసుకుని, కేంద్ర హోంమంత్రి అమిత్ షా నడిపిన 'ఆపరేషన్ దేవేంద్ర' అని ఆయన పేర్కొన్నారు. ఫడ్నవీస్ జాతీయ స్థాయి రాజకీయ ఆశయాలకు అడ్డుకట్ట వేయడానికే ఈ వ్యూహం పన్నారని ఆయన విమర్శించారు.
శనివారం హింగోలిలో నిర్వహించిన బహిరంగ సభలో ఉద్ధవ్ ఠాక్రే ప్రసంగిస్తూ "ఎన్నికలు లేని సమయంలో మా ఎంపీలు పార్టీ మారాల్సిన అవసరం ఏమొచ్చింది? వారు నేరుగా బీజేపీలో చేరకుండా షిండే వర్గంలోకి ఎందుకు వెళ్లారు? ప్రధాని పదవి రేసులోకి ఫడ్నవీస్ రాకుండా నిలువరించి, ఆయన్ను ఒక స్థాయికే పరిమితం చేసేందుకు అమిత్ షా ఈ ఎత్తుగడ వేశారు. భవిష్యత్తులో వారంతా ప్రధాని అభ్యర్థిగా అమిత్ షాకు మద్దతు తెలిపే అవకాశం ఉంది" అని ఉద్ధవ్ అనుమానం వ్యక్తం చేశారు.
ఇటీవల ఉద్ధవ్ వర్గానికి చెందిన ఆరుగురు లోక్సభ సభ్యులు ఏక్నాథ్ షిండే నేతృత్వంలోని శివసేనలో చేరడంతో, పార్లమెంటులో ఉద్ధవ్ వర్గం బలం 9 నుంచి 3కి పడిపోయింది. అయితే, ప్రతిపక్షంలో ఉండటం వల్ల అభివృద్ధి పనులకు ఆటంకం కలుగుతోందని, ఉద్ధవ్ వర్గం నుంచి సరైన సహకారం అందడం లేదని ఫిరాయించిన ఎంపీలు వ్యాఖ్యానించారు. ఈ తాజా పరిణామం 2022 నాటి షిండే తిరుగుబాటును తలపిస్తోంది.
దేశవ్యాప్తంగా నియోజకవర్గాల పునర్విభజన ప్రక్రియను చేపట్టి, ఉత్తర భారతానికి రాజకీయంగా ఎక్కువ ప్రాధాన్యం కల్పించేందుకే బీజేపీ ఇటువంటి ఫిరాయింపులను ప్రోత్సహిస్తోందని ఉద్ధవ్ ఆరోపించారు. ఇదిలావుండగా, శుక్రవారం ముంబై నుంచి నాగ్పూర్కు వెళ్లే విమానంలో ఉద్ధవ్ ఠాక్రే, ఫడ్నవీస్ తారసపడటం, పరస్పరం పలకరించుకోవడం రాజకీయ వర్గాల్లో ఆసక్తిని రేకెత్తించింది.
