గుజరాత్లో చారిత్రక ఘట్టం.. తొలిసారిగా ఐవీఎఫ్ ద్వారా గిర్ దూడ జననం
- అమ్రేలి జిల్లాలోని ప్రభుత్వ ల్యాబొరేటరీలో ఈ ప్రయోగం సక్సెస్
- కాంక్రేజ్ జాతి ఆవు గర్భంలో గిర్ పిండాన్ని ప్రవేశపెట్టి విజయం
- మేలుజాతి ఆవుల సంతతిని పెంచి పాల ఉత్పత్తిని అధికం చేయడమే లక్ష్యం
- ఈ టెక్నాలజీతో ఒకే ఆవు నుంచి 100కు పైగా దూడలను పొందే అవకాశం
ఈ ప్రయోగంలో భాగంగా, అత్యుత్తమ జన్యు లక్షణాలున్న గిర్ జాతి ఆవు నుంచి సేకరించిన అండాలతో ప్రయోగశాలలో పిండాన్ని సృష్టించారు. అనంతరం ఆ పిండాన్ని కాంక్రేజ్ జాతికి చెందిన ఒక అద్దె గర్భం (సరోగసీ) దాల్చిన ఆవులోకి ప్రవేశపెట్టారు. తాజాగా ఆ ఆవు ఒక ఆరోగ్యవంతమైన గిర్ దూడకు జన్మనిచ్చింది.
ఈ విజయంపై రాష్ట్ర పశుసంవర్థక శాఖ మంత్రి జీతూ వాఘాని హర్షం వ్యక్తం చేశారు. "గతేడాది నేషనల్ డెయిరీ డెవలప్మెంట్ బోర్డ్ (ఎన్డీడీబీ) సాంకేతిక సహకారంతో ఈ ఐవీఎఫ్ కార్యక్రమాన్ని ప్రారంభించాం. తొలిదశలో 13 జంతువులపై పిండ మార్పిడి ఆపరేషన్లు నిర్వహించాం. తాజాగా కాంక్రేజ్ జాతికి చెందిన అద్దె తల్లి ద్వారా స్వచ్ఛమైన గిర్ దూడ జన్మించింది. దాత ఆవుకున్న మేలుజాతి లక్షణాలన్నీ ఈ దూడకు సంక్రమిస్తాయి" అని ఆయన వివరించారు.
సాధారణంగా ఒక ఆవు తన జీవితకాలంలో ఏడెనిమిది దూడలకు మాత్రమే జన్మనివ్వగలదు. కానీ ఐవీఎఫ్ టెక్నాలజీతో, మేలుజాతి లక్షణాలున్న ఒకే ఆవు ద్వారా 100కు పైగా దూడలను సృష్టించే అవకాశం ఉంటుంది. రానున్న రోజుల్లో మరో 30కి పైగా జంతువులకు పిండ మార్పిడి చేయాలని అధికారులు లక్ష్యంగా పెట్టుకున్నారు. ఈ విజయంతో గుజరాత్, పశువుల కోసం అభివృద్ధి చేసిన పునరుత్పత్తి సాంకేతికతలో దేశంలోనే ముందు వరుసలో నిలిచింది.
