నల్లమల అటవీప్రాంతంలో కృష్ణానదిపై ఐకానిక్ బ్రిడ్జి!
- సోమశిల-సిద్ధేశ్వరం ఐకాన్ బ్రిడ్జికి అటవీ అనుమతులపై పరిశీలన
- కేంద్ర పర్యావరణ, అటవీ శాఖ అధికారుల బృందం క్షేత్రస్థాయి పర్యటన
- నల్లమల అటవీ ప్రాంతంలో రూ.1086 కోట్లతో వంతెన నిర్మాణం
- కృష్ణానదిపై సోమశిల, మల్లేశ్వరం ప్రాంతాలను కలపనున్న ఈ వంతెన
జాతీయ రహదారి 167కేలో భాగంగా సోమశిల, మల్లేశ్వరం ప్రాంతాలను కలుపుతూ ఈ వంతెనను నిర్మించనున్నారు. దీని నిర్మాణానికి సుమారు రూ.1086 కోట్లు ఖర్చవుతుందని అంచనా. ఈ ప్రాజెక్టు నల్లమల అభయారణ్యం పరిధిలో ఉన్నందున, ఫారెస్ట్ కన్జర్వేషన్ యాక్ట్ ప్రకారం కేంద్రం నుంచి పర్యావరణ, అటవీ అనుమతులు తప్పనిసరి. ఈ నేపథ్యంలోనే అధికారుల బృందం పర్యటన ప్రాధాన్యత సంతరించుకుంది.
ఈ హైబ్రిడ్ కేబుల్-స్టేడ్, సస్పెన్షన్ బ్రిడ్జి నిర్మాణం పూర్తయితే రెండు తెలుగు రాష్ట్రాల మధ్య రవాణా సౌకర్యం గణనీయంగా మెరుగుపడుతుంది. అధికారుల బృందం ఇచ్చే నివేదిక ఆధారంగా కేంద్ర ప్రభుత్వం అటవీ అనుమతులపై తుది నిర్ణయం తీసుకోనుంది. ఈ క్లియరెన్సులు లభించిన వెంటనే ప్రాజెక్టు పనులు వేగవంతం చేసేందుకు మార్గం సుగమం అవుతుంది.
