Agra: పార్కింగ్ లో ఆడుకుంటున్న పాపపైకి దూసుకెళ్లిన కారు.. షాకింగ్ వీడియో!
- ఆగ్రాలో తల్లిదండ్రుల కళ్లెదుటే ప్రమాదం
- హుటాహుటిన ఆసుపత్రికి తరలింపు
- చికిత్స పొందుతూ చిన్నారి మృత్యువాత
ఆగ్రాలో దారుణం చోటుచేసుకుంది.. షాపింగ్ మాల్ పార్కింగ్ లో ఆడుకుంటున్న ఓ చిన్నారిపైకి కారు దూసుకెళ్లింది. తీవ్రగాయాలపాలైన పాప ఆసుపత్రికి తరలించే లోపే చనిపోయింది. అక్కడే ఉన్న పాప తల్లిదండ్రులు గమనించేలోగానే ఘోరం జరిగిపోయింది. సోషల్ మీడియాలో వైరల్ గా మారిన ఈ వీడియో చూపరులను కన్నీళ్లు పెట్టిస్తోంది. ఈ ప్రమాదానికి సంబంధించిన వివరాలు.. ఆగ్రాలోని కాస్మోస్ మాల్ కార్ పార్కింగ్ లో ఆగస్టు 6న జరిగిన ఈ యాక్సిడెంట్ కు సంబంధించిన వీడియో ప్రస్తుతం బయటకు వచ్చింది.
మాల్ లో షాపింగ్ పూర్తిచేసుకుని పాపతో పార్కింగ్ ఏరియాలోకి వచ్చిన తల్లిదండ్రులు ఏదో విషయంపై మాట్లాడుకుంటున్నారు. పాప అక్కడే తిరుగుతూ ఆడుకుంటోంది. ఇంతలో ఓ కారు లోపలికి రావడం, పార్కింగ్ కోసం రివర్స్ చేసుకోవడం చూడొచ్చు. పాప ఆడుకుంటూ ఆ కారు ముందుకు రావడం గమనించని డ్రైవర్.. కారును ముందుకు కదిలించాడు. దీంతో పాప కింద పడిపోగా కారు ముందు టైర్ పైకెక్కింది. పాప ఏడుపుతో తల్లి ఈ ఘోరాన్ని గమనించింది. హడావుడిగా అదే కారులో పాపను ఆసుపత్రికి తరలించారు. అయితే, పాపను కాపాడేందుకు శాయశక్తులా కృషి చేసినా ఉపయోగం లేకుండా పోయిందని వైద్యులు చెప్పారు.
