Sreeleela: మరోసారి రవితేజ జోడీ కడుతున్న శ్రీలీల!
![Sreeleela Special](https://imgb.ap7am.com/thumbnail/cr-20240528tn6655b11423a45.jpg)
- గతంలో 'ధమాకా'లో సందడి చేసిన శ్రీలీల
- రవితేజ హీరోగా భాను భోగవరపు దర్శకత్వంలో సినిమా
- సితార బ్యానర్లో రూపొందే సినిమా ఇది
టాలీవుడ్ లో కెరియర్ ను మొదలుపెడుతూనే రాకెట్ స్పీడ్ తో దూసుకుపోయిన కథానాయికల జాబితాలో శ్రీలీల కనిపిస్తుంది. అందం .. అభినయం .. డాన్స్ .. ఈ మూడు విషయాల్లో వంకపెట్టలేని హీరోయిన్ ఆమె. అలాంటి శ్రీలీలకు ఈ మధ్య వరుస పరాజయాలు ఎదురవుతూ రావడం ఆమె అభిమానులను నిరాశపరిచిన అంశం.
శ్రీలీల చేసిన 'ఆదికేశవ' .. 'ఎక్స్ ట్రా ఆర్డినరీ మెన్' సినిమాలు చాలా దారుణమైన పరాజయాలను చూశాయి. ఆ తరువాత వచ్చిన 'గుంటూరు కారం' యావరేజ్ టాక్ నే తెచ్చుకుంది. ప్రస్తుతం 'ఉస్తాద్ భగత్ సింగ్' మాత్రమే సెట్స్ పై ఉంది. ఈ నేపథ్యంలో ఆమె మరోసారి రవితేజతో కలిసి సందడి చేయనుందనే టాక్ బలంగా వినిపిస్తోంది.
ప్రస్తుతం రవితేజ 'మిస్టర్ బచ్చన్' సినిమా చేస్తున్నాడు. ఆ తరువాత సినిమాను ఆయన సితార బ్యానర్లో చేయనున్నట్టుగా సమాచారం. ఈ సినిమాతో భాను భోగవరపు దర్శకుడిగా పరిచయమవుతున్నాడు. ఈ సినిమా కోసం కథానాయికగా శ్రీలీలను తీసుకోనున్నారని సమాచారం. అదే నిజమైతే, 'ధమాకా' తరువాత ఈ జంట సందడి చేసే సినిమా ఇదే అవుతుంది.