తమిళ అగ్రహీరో సరసన కీర్తి సురేశ్?

కీర్తి సురేశ్ కి మొదటి నుంచీ హోమ్లీ హీరోయిన్ అనే ముద్రపడింది. ఆమె చేసే పాత్రలు ఎక్కువగా అలాంటివే కావడంతో ఆ ఇమేజ్ వచ్చేసింది. అయితే, ఇప్పుడు కాస్త రూటు మార్చింది. ప్రస్తుతం గ్లామర్ పాత్రలు చేయడానికి కూడా ఈ చిన్నది ఆసక్తి చూపుతోంది. ఇందులో భాగంగా ఇప్పటికే మహేశ్ బాబు సరసన 'సర్కారువారి పాట' సినిమాలో గ్లామరస్ హీరోయిన్ గా కనిపించనుంది.

ఈ క్రమంలో తాజాగా ఆమెకు తమిళ స్టార్ హీరో విజయ్ సరసన నటించే ఛాన్స్ వచ్చినట్టు తెలుస్తోంది. విజయ్ హీరోగా తెలుగు దర్శకుడు వంశీ పైడిపల్లి దర్శకత్వంలో ఓ సినిమా రూపొందనుంది. ప్రముఖ నిర్మాత దిల్ రాజు దీనిని పాన్ ఇండియా మూవీగా నిర్మించడానికి సన్నాహాలు చేస్తున్నారు.

ఇందులో కథానాయికగా కీర్తి సురేశ్ ని ఎంచుకున్నట్టు, ప్రస్తుతం చిత్ర బృందం ఈ విషయంలో ఆమెతో సంప్రదింపులు జరుపుతున్నట్టు తెలుస్తోంది. ఇది కనుక ఖరారైతే కథానాయికగా కీర్తి సురేశ్ స్థాయి మరో మెట్టు ఎక్కుతుందని చెప్పచ్చు. ప్రస్తుతం ఈ చిత్రానికి సంబంధించిన ప్రీ ప్రొడక్షన్ పనులు జరుగుతున్నాయి.