ఫ్లైదుబాయ్ విమాన ఘటన... భారత సంతతి కెప్టెన్ సాహసం

దుబాయ్ నుంచి టెల్ అవీవ్ వెళ్తున్న ఫ్లైదుబాయ్ విమానంలో తీవ్ర ఉద్రిక్తత చోటుచేసుకుంది. విమానం కాక్‌పిట్‌లోనే కెప్టెన్‌పై తోటి కో-పైలట్ కత్తితో దాడికి తెగబడ్డాడు. ఈ దాడిని అత్యంత సాహసంతో తిప్పికొట్టిన భారత సంతతికి చెందిన కెప్టెన్, ప్రయాణికుల సహకారంతో విమానాన్ని పెను ప్రమాదం నుంచి రక్షించారు. ఈ అవాంఛనీయ ఘటన నేపథ్యంలో విమానాన్ని సౌదీ అరేబియాలో అత్యవసరంగా ల్యాండ్ చేశారు.

సుమారు 180 మంది ప్రయాణికులతో కూడిన ఫ్లైదుబాయ్ విమానం టెల్ అవీవ్‌కు ప్రయాణిస్తుండగా, మార్గమధ్యంలో కో-పైలట్ ఆకస్మికంగా కెప్టెన్‌పై దాడికి పాల్పడ్డాడు. వెంటనే అప్రమత్తమైన కెప్టెన్ అతడిని సమర్థంతంగా ప్రతిఘటించారు. కాక్‌పిట్‌లో జరుగుతున్న పరిణామాలను గమనించిన ప్రయాణికుల్లోని కొందరు ఆఫ్-డ్యూటీ పైలట్లు, ఇతర ప్రయాణికులు వెంటనే స్పందించి కో-పైలట్‌ను నిలువరించి, అదుపులోకి తీసుకున్నారు.

ఈ ఉద్రిక్త పరిస్థితుల్లో విమానం నుంచి హైజాకింగ్ కోడ్ (7500) సహా పలు అత్యవసర సంకేతాలను పంపారు. అనంతరం విమానాన్ని సౌదీ అరేబియాలోని తబుక్ విమానాశ్రయంలో సురక్షితంగా దింపారు. ఈ దాడిలో ఇద్దరు పైలట్లు గాయపడగా, వారిని చికిత్స నిమిత్తం హుటాహుటిన ఆసుపత్రికి తరలించారు.

ఇజ్రాయెల్ మీడియా కథనాల ప్రకారం, దాడిని అడ్డుకున్న కెప్టెన్ భారత జాతీయుడని, దాడికి పాల్పడిన కో-పైలట్ ఒమన్‌కు చెందిన వ్యక్తి అని సమాచారం. అయితే, వీరి జాతీయతలకు సంబంధించి అధికారిక ప్రకటన వెలువడాల్సి ఉంది. విమానాన్ని హైజాక్ చేసేందుకు లేదా కూల్చివేసేందుకు ఉగ్రవాద కోణంలో ఈ దాడి జరిగి ఉండవచ్చని ఇజ్రాయెల్ అధికారులు అనుమానిస్తూ దర్యాప్తు ప్రారంభించారు.