షూటింగ్ స్పాట్‌కు ఆటోలో వచ్చిన రజనీకాంత్

సూపర్ స్టార్ రజనీకాంత్ మరోసారి తన నిరాడంబరతను చాటుకుని అందరినీ ఆశ్చర్యపరిచాడు. ప్రస్తుతం తాను నటిస్తున్న 'ధర్మన్' చిత్ర షూటింగ్ నిమిత్తం మైసూర్‌లో ఉన్న ఆయన, సెట్‌కు ఏకంగా ఆటో రిక్షాలో చేరుకున్నాడు. ఈ అనూహ్య దృశ్యాన్ని చూసి అక్కడున్న అభిమానులు, చిత్ర బృందం ఒక్కసారిగా ఆశ్చర్యానికి లోనయ్యారు. దీనికి సంబంధించిన వీడియోలు ప్రస్తుతం సోషల్ మీడియాలో విపరీతంగా వైరల్ అవుతున్నాయి.

మైసూర్‌లో జరుగుతున్న 'ధర్మన్' సినిమా షూటింగ్ లొకేషన్‌కు రజనీకాంత్ ఆటోలో రావడం విశేషం. మెరూన్ రంగు చొక్కా, పంచె కట్టుకుని ఆటో దిగిన ఆయన, తన కోసం ఎదురుచూస్తున్న అభిమానులకు వినమ్రంగా చేతులు జోడించి నమస్కరించాడు. అందరికీ అభివాదం చేస్తూ సెట్‌లోకి వెళ్లాడు. గేటు మూసివేస్తున్న సమయంలోనూ, బయట 'తలైవా' అంటూ నినాదాలు చేస్తున్న అభిమానుల కోసం ఆయన మరోసారి బయటకు వచ్చి వారిని పలకరించడం అందరినీ ఆకట్టుకుంది.

అశ్వత్ మరిముత్తు దర్శకత్వంలో 'ధర్మన్' చిత్రం రూపొందుతోంది. కమల్ హాసన్‌కు చెందిన రాజ్ కమల్ ఫిల్మ్స్ ఇంటర్నేషనల్, టర్మరిక్ మీడియా సంస్థలు సంయుక్తంగా ఈ సినిమాను నిర్మిస్తున్నాయి. ఇందులో రజనీకాంత్ వైద్యుడి పాత్రలో నటిస్తుండగా, సిమ్రాన్, రాశీ ఖన్నా, యోగి బాబు కీలక పాత్రలు పోషిస్తున్నారు. ఇటీవలే మైసూరులో ఈ సినిమా మూడో షెడ్యూల్ చిత్రీకరణ పూర్తయింది. ఈ ఘటనతో సూపర్ స్టార్ సింప్లిసిటీపై నెటిజన్లు ప్రశంసలు వర్షం కురిపిస్తున్నారు.