హైదరాబాద్‌లో బ్రిగేడ్ గ్రూప్ భారీ ప్రాజెక్ట్.. రూ. 2700 కోట్లతో 'బార్సిలోనా'

హైదరాబాద్ రియల్ ఎస్టేట్ రంగంలో మరో భారీ ప్రాజెక్ట్ ప్రారంభమైంది. ప్రముఖ నిర్మాణ సంస్థ బ్రిగేడ్ ఎంటర్‌ప్రైజెస్ లిమిటెడ్, నగరంలోని కోకాపేట నియోపోలిస్‌లో 'బ్రిగేడ్ బార్సిలోనా' పేరుతో ఓ భారీ హై-రైజ్ రెసిడెన్షియల్ ప్రాజెక్టును లాంచ్ చేసింది. ఈ ప్రాజెక్ట్ ద్వారా రూ. 2,700 కోట్లకు పైగా ఆదాయం వస్తుందని కంపెనీ అంచనా వేస్తోంది.

ఈ ప్రాజెక్టును నియోపోలిస్ ఫేజ్ IIIలోని ప్లాట్ నంబర్ 20లో, 4.04 ఎకరాల విస్తీర్ణంలో నిర్మిస్తున్నారు. ఈ భూమిని గతేడాది డిసెంబర్ 2025లో హైదరాబాద్ మెట్రోపాలిటన్ డెవలప్‌మెంట్ అథారిటీ (హెచ్‌ఎండీఏ) నిర్వహించిన వేలంలో బ్రిగేడ్ సంస్థ దక్కించుకుంది. ఎకరాకు రూ. 118 కోట్ల చొప్పున, మొత్తం రూ. 476.72 కోట్లు చెల్లించి ఈ స్థలాన్ని కొనుగోలు చేసింది. ఆ వేలంలో కోకాపేటలో భూముల ధరలు ఎకరాకు రూ. 100 కోట్లు దాటిన విషయం తెలిసిందే.

ఈ 4.04 ఎకరాల స్థలంలో 650కి పైగా ప్రీమియం నివాసాలను నిర్మించనున్నారు. ఇందులో 3-బీహెచ్‌కే, స్టడీ రూమ్‌తో కూడిన 3-బీహెచ్‌కే, 4-బీహెచ్‌కే అపార్ట్‌మెంట్లు ఉంటాయి. మొత్తం 52 అంతస్తుల సూపర్ స్ట్రక్చర్, ఐదు పోడియం లెవెల్స్, రెండు బేస్‌మెంట్‌లతో ఈ టవర్‌ను ప్లాన్ చేశారు. ఫ్లాట్ల విస్తీర్ణం 2,789 చదరపు అడుగుల నుంచి 3,765 చదరపు అడుగుల వరకు ఉంటుంది. ఈ ప్రాజెక్టుకు 2026 జులై 27న హెచ్‌ఎండీఏ నుంచి ప్రణాళిక అనుమతులు లభించాయి.

స్పానిష్ ఆర్కిటెక్చర్ స్ఫూర్తితో ఈ ప్రాజెక్టును తీర్చిదిద్దుతున్నామని, ఎకో-డెక్, రూఫ్‌టాప్ స్కైవాక్ వంటి ప్రత్యేక సౌకర్యాలు కల్పిస్తున్నామని బ్రిగేడ్ తెలిపింది. ఇప్పటికే ఇదే ప్రాంతంలో 'బ్రిగేడ్ గేట్‌వే' అనే మరో ప్రాజెక్టును కూడా ఈ సంస్థ అభివృద్ధి చేస్తోంది. ఫైనాన్షియల్ డిస్ట్రిక్ట్, గచ్చిబౌలి, హైటెక్ సిటీకి సమీపంలో ఉండటంతో నియోపోలిస్ ప్రాంతం ప్రీమియం ప్రాజెక్టులకు కేంద్రంగా మారింది. 2031 నాటికి ఈ ప్రాజెక్టును పూర్తి చేయాలని లక్ష్యంగా పెట్టుకున్నారు.