హిందూ బృందం పర్యటన.. పారిస్లో ఈఫిల్ టవర్ మూసివేత
- పారిస్లోని ఈఫిల్ టవర్ వద్ద సిబ్బంది నిరసనతో మూసివేత
- హిందూ సంస్థ ప్రతినిధుల పర్యటన వేళ వివాదం
- మహిళా ఉద్యోగులను పక్కన పెట్టడంపై తీవ్ర ఆగ్రహం
- సిబ్బందికి క్షమాపణలు చెప్పిన యాజమాన్యం
- ఘటనపై విచారం వ్యక్తం చేసిన బీఏపీఎస్ హిందూ సంస్థ
ప్రపంచ ప్రఖ్యాత పర్యాటక కేంద్రం, పారిస్లోని ఈఫిల్ టవర్ సోమవారం సందర్శకులకు మూతపడింది. ఒక హిందూ మత సంస్థ ప్రతినిధుల పర్యటన సందర్భంగా మహిళా సిబ్బంది పట్ల వివక్ష చూపారన్న ఆరోపణలపై ఉద్యోగులు నిరసనకు దిగడమే ఇందుకు కారణమైంది. ఈ ఘటన ఫ్రాన్స్లో తీవ్ర చర్చనీయాంశంగా మారింది.
బోచాసణ్వాసి అక్షర్ పురుషోత్తం స్వామినారాయణ్ సంస్థ (బీఏపీఎస్)కు చెందిన సుమారు 100 మంది ప్రతినిధుల బృందం శనివారం ఈఫిల్ టవర్ను సందర్శించింది. పారిస్ సమీపంలో నిర్మించిన తమ ఆలయ ప్రారంభోత్సవ వేడుకల సందర్భంగా ఈ పర్యటన జరిగింది. అయితే, ఈ బృందం పర్యటించే సమయంలో మహిళా సిబ్బంది కంటికి కనిపించకుండా ఉండాలని, తమ స్థానాల నుంచి తప్పుకోవాలని, కొన్ని ప్రాంతాలకు దూరంగా ఉండాలని యాజమాన్యం ఆదేశాలు జారీ చేసినట్లు కార్మిక సంఘాలు ఆరోపించాయి. మహిళల స్థానంలో పురుష సిబ్బందిని నియమించారని, బృందానికి కేవలం పురుష ఉద్యోగులు మాత్రమే తోడుగా వెళ్లారని వారు తెలిపారు.
ఈ చర్యను ఉద్యోగ సంఘాలు తీవ్రంగా ఖండించాయి. "లింగం కారణంగా మహిళా ఉద్యోగులను పక్కనపెట్టి, వారిని కనిపించకుండా చేసేలా వృత్తిపరమైన ఆదేశాలు ఇవ్వడం దారుణం" అని సిబ్బంది ఒక ప్రకటనలో పేర్కొన్నారు. ఈ ఘటనపై తీవ్ర ఆగ్రహం వ్యక్తం చేసిన ఉద్యోగులు సోమవారం నిరసనకు దిగారు. భవిష్యత్తులో ఇలాంటివి పునరావృతం కాకుండా యాజమాన్యం నుంచి స్పష్టమైన హామీ కోరారు.
వివాదంపై ఈఫిల్ టవర్ను నిర్వహించే సొసైటీ డి'ఎక్స్ప్లాయిటేషన్ డి లా టూర్ ఈఫిల్ (ఎస్ఈటీఈ) స్పందించింది. మహిళలతో పరస్పర చర్యలను పరిమితం చేయాలని ప్రతినిధి బృందం కోరిన మాట వాస్తవమేనని అంగీకరించింది. అయితే, "అటువంటి షరతులను అంగీకరించి ఉండాల్సింది కాదు" అని పేర్కొంటూ సిబ్బందికి క్షమాపణలు చెప్పింది. ఈ ఘటనపై విచారణ జరిపి తగిన చర్యలు తీసుకుంటామని హామీ ఇచ్చింది.
పారిస్ మేయర్ ఇమ్మాన్యుయేల్ గ్రెగోయిర్ ఈ ఘటనను "ఆమోదయోగ్యం కాదు" అని అభివర్ణించారు. స్త్రీ, పురుష సమానత్వం ప్రతిచోటా వర్తించాలని స్పష్టం చేస్తూ, ఘటనపై విచారణకు ఆదేశించారు. పలువురు ఫ్రెంచ్ రాజకీయ నాయకులు కూడా ఈ నిర్ణయాన్ని తప్పుపట్టారు.
మరోవైపు, ఈ ఘటనపై బీఏపీఎస్ ప్యారిస్ దేవాలయం ఒక ప్రకటనలో విచారం వ్యక్తం చేసింది. "ఈ పరిస్థితి వల్ల ఎవరైనా ఇబ్బంది పడినా, బాధపడినా వారికి హృదయపూర్వక క్షమాపణలు చెబుతున్నాం. ఈ ఆందోళనలను మేం చాలా సీరియస్గా తీసుకుంటున్నాం" అని పేర్కొంది. పరస్పర గౌరవానికి తాము కట్టుబడి ఉన్నామని స్పష్టం చేసింది. సోమవారం రోజంతా మూసివేసిన ఈఫిల్ టవర్ను మంగళవారం నుంచి యథావిధిగా తెరిచే అవకాశం ఉంది.
