హాట్ స్టార్ లో తమిళ క్రైమ్ థ్రిల్లర్!

తమిళంలో హీరోగా అథర్వ మురళికి మంచి క్రేజ్ ఉంది. ఆయన హీరోగా చేసిన సినిమానే 'DNA'. నెల్సన్ వెంకటేశన్ ఈ సినిమాకి దర్శకత్వం వహించాడు. నెల్సన్ వెంకటేశన్ పేరు వినగానే అందరికీ గుర్తుకు వచ్చే సినిమా 'ఫర్హానా'. ఐశ్వర్య రాజేశ్ ప్రధానమైన పాత్రను పోషించిన ఈ సినిమా భారీ విజయాన్ని సాధించింది. ఓటీటీ వైపు నుంచి కూడా ఈ సినిమాకి మంచి రెస్పాన్స్ వచ్చింది. అలాంటి దర్శకుడు రూపొందించిన సినిమా ఇది. 

అథర్వ మురళి సరసన నిమిషా సజయన్ నటించింది. ఈ సినిమాలో ఈ ఇద్దరూ భార్యాభర్తలుగా కనిపించనున్నారు. ఈ నెల 19వ తేదీ నుంచి ఈ సినిమాను జియో హాట్ స్టార్ లో స్ట్రీమింగ్ చేయనున్నారు. తమిళంతో పాటు తెలుగు .. హిందీ .. మలయాళ .. కన్నడ భాషల్లో అందుబాటులోకి రానుంది. జిబ్రాన్ నేపథ్య సంగీతం అందించిన ఈ సినిమాపై అందరిలో ఆసక్తి ఉంది. 

ఈ సినిమాలో హీరో - హీరోయిన్ భార్యాభర్తలు. తొలి సంతానం విషయంలో వాళ్లిద్దరూ ఎన్నో కలలు కంటారు. వారికి ఒక బిడ్డ కలుగుతుంది. అయితే ఆ బిడ్డ తమ బిడ్డ కాదనే అనుమానం వారికి కలుగుతుంది. DNA టెస్ట్ చేయించడంతో వారి అనుమానం నిజమవుతుంది. తమ బిడ్డ ఏమైపోయింది? ఎవరు కిడ్నాప్ చేయించారు? అనే విషయాన్ని తెలుసుకోవడానికి ఈ జంట చేసే పోరాటమే ఈ సినిమా.