షూటింగ్ లో గాయపడ్డ విజయ్ దేవరకొండ, సమంత?

యంగ్ హీరో విజయ్ దేవరకొండ, అందాల భామ సమంత జంటగా నటిస్తున్న సినిమా 'ఖుషి'. 'మజిలి' సినిమాతో మంచి మార్కులు కొట్టేసిన శివ నిర్వాణ ఈ చిత్రానికి దర్శకత్వం వహిస్తున్నారు. కశ్మీర్ లో ఈ చిత్రం షూటింగ్ జరుపుకుంటోంది. ఇటీవలే ఈ చిత్రం తొలి షెడ్యూల్ ను పూర్తి చేసుకున్నట్టు శివ తెలిపారు. దాదాపు 20 రోజుల పాటు తొలి షెడ్యూల్ షూటింగ్ జరుపుకుంది. ఈ చిత్రంలో వెన్నెల కిశోర్, శరణ్య తదితరులు కీలక పాత్రలను పోషించారు. 

మరోవైపు ఈ చిత్రానికి సంబంధించి ఒక షాకింగ్ న్యూస్ బయటపడింది. షూటింగ్ లో విజయ్ దేవరకొండ, సమంత గాయపడ్డారనేది ఆ వార్త సారాంశం. కశ్మీర్ లోని పహల్గామ్ ప్రాంతంలో చిత్రీకరించిన ఒక స్టంట్ సీన్ లో... లిడ్డర్ నదిపై తాడుతో నిర్మించిన వంతెనపై నుంచి వాహనాన్ని నడపాల్సి ఉందట.. ఆ సీన్ చేస్తున్నప్పుడు వాహనం నీటిలో పడటంతో ఇద్దరికీ గాయాలైనట్టు సమాచారం. ప్రమాదం జరిగిన వెంటనే వీరిద్దరికీ చికిత్స అందించారట. అయితే, ఈ ప్రమాదంపై ఎలాంటి అధికారిక ప్రకటన వెలువడకపోవడం గమనార్హం. 

మరోవైపు కశ్మీర్ లో తొలి షెడ్యూల్ పూర్తి చేసుకున్న 'ఖుషి' టీమ్ హైదరాబాద్ కు పయనమైంది. జూన్ లో రెండో షెడ్యూల్ ప్రారంభమవుతుంది. ఈ చిత్రాన్ని మైత్రీ మూవీ మేకర్స్ నిర్మిస్తోంది. తెలుగు, తమిళ, కన్నడ, మలయాళ భాషల్లో డిసెంబర్ 23న ఇది విడుదల కానుంది. రొమాంటిక్ లవ్ స్టోరీ, థ్రిల్లర్ గా తెరకెక్కుతున్న ఈ చిత్రంపై భారీ అంచనాలు నెలకొన్నాయి.