కమల్ తో తలపడే విలన్ విజయ్ సేతుపతినే!

విజయ్ సేతుపతి .. తమిళనాట ఈ పేరుకు ఉన్న క్రేజ్ అంతా ఇంతా కాదు. మాస్ ఆడియన్స్ లో ఆయనకి గల క్రేజ్ ను చూస్తే ఎవరికైనా ఆశ్చర్యం కలగకమానదు. విజయ్ సేతుపతిని అక్కడివాళ్లు ఎందుకు అంతగా అభిమానిస్తారంటే.. వైవిధ్యంతో కూడిన ఆయన అభినయమే. తెరపై ఆయన ఏ పాత్రను పోషించినా ఆ పాత్ర మినహా ఆయన ఎక్కడా కనిపించడు. ఎలాంటి పరిస్థితుల్లోను ఆయన ఆ పాత్రలో నుంచి బయటికి రాడు. హీరోగా .. విలన్ గా ఒకే సమయంలో రాణించడం ఆయనకే చెల్లిందేమో!

అలాంటి విజయ్ సేతుపతి .. కమల్ 'విక్రమ్' సినిమాలో ప్రతినాయకుడిగా చేస్తున్నాడు. తాజాగా ఆయన ఈ ప్రాజెక్టుపై సైన్ చేసినట్టుగా తెలుస్తోంది. ఇది కమల్ సొంత బ్యానర్లో నిర్మితమవుతోంది. కమల్ తనని ఎదుర్కునే పాత్రకి విజయ్ సేతుపతిని ఎంపిక చేశారంటే, నటుడిగా ఆయన ఏ స్థాయికి వెళ్లాడనేది అర్థం చేసుకోవచ్చు. కార్తి హీరోగా చేసిన 'ఖైదీ' .. విజయ్ కథానాయకుడిగా చేసిన 'మాస్టర్' సినిమాకి దర్శకత్వం వహించిన లోకేశ్ కనగరాజ్, ఈ సినిమాకి దర్శకత్వం వహిస్తున్నాడు.