ప్రేమకథా చిత్రంలో అనుష్క సరసన నవీన్ పోలిశెట్టి!

ఇటీవలి కాలంలో బాగా పేరుతెచ్చుకుంటున్న యువ కథానాయకుడుగా నవీన్ పోలిశెట్టిని చెప్పుకోవచ్చు. ఏ పాత్రనైనా మంచి ఈజ్ తో అభినయిస్తూ.. మంచి ఆర్టిస్టుగా గుర్తింపు తెచ్చుకున్నాడు. తాజాగా విడుదలైన 'జాతిరత్నాలు' చిత్రమైతే సూపర్ హిట్ కావడంతో నవీన్ కి మరింత పేరువచ్చింది. దీంతో అతనికి ఆఫర్లు కూడా వెల్లువెత్తుతున్నాయి. ఈ క్రమంలో ప్రముఖ నటి అనుష్క సరసన నటించే ఛాన్స్ ఈ కుర్రాడికి వచ్చినట్టు తెలుస్తోంది.

'నిశ్శబ్దం' తర్వాత కాస్త గ్యాప్ తీసుకున్న అనుష్క ఇప్పుడు ఓ వెరైటీ ప్రేమకథ చిత్రంలో నటించడానికి అంగీకరించింది. గతంలో 'రారా కృష్ణయ్య' చిత్రాన్ని రూపొందించిన మహేశ్ దీనికి దర్శకత్వం వహిస్తాడు. ఈ చిత్రంలో హీరోగా తాజాగా నవీన్ పోలిశెట్టిని ఎంపిక చేసినట్టు సమాచారం. నలభై ఏళ్ల మహిళ.. పాతికేళ్ల కుర్రాడి మధ్య ప్రేమకథగా ఇది తెరకెక్కుతుందట. దీనిని దృష్టిలో పెట్టుకునే నవీన్ ని ఎంపిక చేసినట్టు తెలుస్తోంది. యూవీ క్రియేషన్స్ సంస్థ దీనిని నిర్మిస్తుంది.