కాక్రోచ్ పార్టీ నేత అభిజీత్ దిప్కే ఇంట విషాదం

'కాక్రోచ్ జనతా పార్టీ' (సీజేపీ) వ్యవస్థాపకుడు అభిజీత్ దిప్కే ఇంట తీవ్ర విషాదం నెలకొంది. ఆయన నాయనమ్మ ఈరోజు మహారాష్ట్రలోని హింగోలి జిల్లాలో కన్నుమూశారు. అదే సమయంలో అభిజీత్ దిల్లీలో పోలీసుల అదుపులో ఉండటం పరిస్థితిని మరింత క్లిష్టంగా మార్చింది. ఈ కష్ట సమయంలో కుటుంబంతో ఉండేందుకు ఆయనకు పోలీసులు అనుమతి ఇస్తారా లేదా అనే దానిపై సర్వత్రా ఉత్కంఠ నెలకొంది.

వివరాల్లోకి వెళితే.. మహారాష్ట్రలోని హింగోలి జిల్లా సంతుక్ పింప్రి గ్రామంలో నివసిస్తున్న అభిజీత్ నాయనమ్మ (తండ్రి భగవాన్ దిప్కే తల్లి) గత కొంతకాలంగా దీర్ఘకాలిక అనారోగ్యం, వయసురీత్యా సమస్యలతో బాధపడుతున్నారు. శనివారం ఆమె ఆరోగ్యం విషమించి తుదిశ్వాస విడిచారు. ఈ వార్త తెలిసే సమయానికి అభిజీత్ దిల్లీలో పోలీసుల నిర్బంధంలో ఉన్నారు.

ఓటర్ల జాబితా సవరణలో అవకతవకలు జరిగాయని ఆరోపిస్తూ, ప్రధాన ఎన్నికల కమిషనర్ (సీఈసీ) జ్ఞానేశ్ కుమార్ రాజీనామా చేయాలని డిమాండ్ చేస్తూ సీజేపీ జంతర్ మంతర్ వద్ద నిరసనకు పిలుపునిచ్చింది. ఇందులో పాల్గొనేందుకు అభిజీత్, మరో ఇద్దరు పార్టీ సభ్యులు సౌరవ్ దాస్, అశుతోష్ రాంకాలతో కలిసి ముంబై నుంచి దిల్లీకి విమానంలో బయలుదేరారు. అయితే, విమానం ఇందిరాగాంధీ అంతర్జాతీయ విమానాశ్రయంలో ల్యాండ్ అయిన వెంటనే, దిల్లీ పోలీసులు విమానంలోకి ప్రవేశించి ముగ్గురినీ అదుపులోకి తీసుకున్నారు.