ఇబ్రహీంపట్నం ఎమ్మెల్యే వీడియో వివాదం.. షేర్ చేసిన వారిపై కేసు

బస్సులో ఒక విద్యార్థిని పట్ల అసభ్యంగా ప్రవర్తించారంటూ కాంగ్రెస్ ఎమ్మెల్యే మల్‌రెడ్డి రంగారెడ్డిపై వస్తున్న ఆరోపణలు నేపథ్యంలో, ఆ ఘటనకు సంబంధించిన వీడియోను సోషల్ మీడియాలో షేర్ చేస్తున్న వారిపై పోలీసులు కేసు నమోదు చేశారు. ఎమ్మెల్యే ప్రతిష్ఠకు భంగం కలిగించేలా ఈ వీడియోను ప్రచారం చేస్తున్నారంటూ ఇబ్రహీంపట్నం యూత్ కాంగ్రెస్ అధ్యక్షుడు వి. సికిందర్ రెడ్డి ఫిర్యాదు చేశారు. ఈ ఫిర్యాదు మేరకు పోలీసులు బుధవారం కేసు నమోదు చేసి దర్యాప్తు చేపట్టారు.

తెలంగాణ ప్రభుత్వం అమలు చేస్తున్న 'మహాలక్ష్మి' ఉచిత బస్సు ప్రయాణ పథకం పనితీరును క్షేత్రస్థాయిలో పరిశీలించేందుకు ఇబ్రహీంపట్నం ఎమ్మెల్యే మల్‌రెడ్డి రంగారెడ్డి అక్టోబర్ 6వ తేదీన ఔటర్ రింగ్ రోడ్డులో ప్రయాణిస్తున్న టీజీఎస్‌ఆర్టీసీ బస్సు ఎక్కారు. ఈ సందర్భంగా ఆయన ఒక కళాశాల విద్యార్థినితో మాట్లాడారు. ఈ పథకం ద్వారా తనకు ఏడాదికి సుమారు రూ. 45,000 ఆదా అవుతున్నాయని ఆమె ఎమ్మెల్యేకు వివరించారు. అయితే, ఈ సంభాషణ జరుగుతున్న సమయంలో ఎమ్మెల్యే సదరు విద్యార్థినిని తాకడం వివాదాస్పదమైంది. ఇందుకు సంబంధించిన వీడియో సోషల్ మీడియాలో వైరల్‌గా మారింది.

ఈ వీడియో సామాజిక మాధ్యమాల్లో విస్తృతంగా ప్రచారమవ్వడంతో విమర్శలు వెల్లువెత్తాయి. దీనిపై స్పందించిన యూత్ కాంగ్రెస్ అధ్యక్షుడు సికిందర్ రెడ్డి పోలీసులకు ఫిర్యాదు చేశారు. బస్సు మలుపు తిరుగుతున్న సమయంలో ప్రమాదవశాత్తు మాత్రమే ఎమ్మెల్యే చేయి ఆ యువతికి తగిలిందని, కానీ బీఆర్ఎస్ నాయకులు దీనిని ఉద్దేశపూర్వకంగా తప్పుడు కోణంలో చిత్రీకరించి ప్రచారం చేస్తున్నారని ఆయన ఆరోపించారు. ఎమ్మెల్యే ప్రతిష్ఠను దెబ్బతీసేందుకే ఈ కుట్ర పన్నారని ఫిర్యాదులో పేర్కొన్నారు.

సికిందర్ రెడ్డి ఫిర్యాదు ఆధారంగా, పరువు నష్టం కలిగించే ఉద్దేశంతో దుష్ప్రచారం చేయడం, ఫోర్జరీ, పబ్లిక్ మిస్చీఫ్ వంటి అభియోగాలతో పాటు ఐటీ చట్టంలోని సెక్షన్ 67 కింద వీడియోను షేర్ చేస్తున్న వారిపై పోలీసులు కేసు నమోదు చేశారు.