టీడీపీ ఎమ్మెల్యే మారువేషం.. ఎక్కడంటే..!

పోలవరం ఎమ్మెల్యే చిర్రి బాలరాజు సామాన్యుడిలా మారువేషంలో వెళ్లి ఓ ప్రభుత్వ కార్యాలయాన్ని ఆకస్మికంగా తనిఖీ చేశారు. ఏలూరు జిల్లా బుట్టాయగూడెం తహసీల్దార్ కార్యాలయంలో మంగళవారం చోటుచేసుకున్న ఈ ఘటన స్థానికంగా ఆసక్తిని రేకెత్తించింది. కార్యాలయ సిబ్బంది పనితీరును, ప్రజలకు అందుతున్న సేవల నాణ్యతను స్వయంగా పరిశీలించేందుకే ఆయన ఈ తనిఖీ చేపట్టారు.

ఎమ్మెల్యే బాలరాజు మంగళవారం ఉదయం 11:30 గంటల సమయంలో గళ్ల లుంగీ, టీ-షర్ట్ ధరించి, ముఖానికి మాస్క్ పెట్టుకుని తహసీల్దార్ కార్యాలయానికి చేరుకున్నారు. సుమారు గంటపాటు అక్కడే ఉండి, కార్యాలయ కార్యకలాపాలను, సిబ్బంది ప్రవర్తనను నిశితంగా గమనించారు. మారువేషంలో ఉండటంతో అక్కడ ఉన్నవారెవరూ ఆయన్ను గుర్తుపట్టలేకపోయారు.

అదే సమయంలో, తన స్థల వివాదం పరిష్కారం కావడం లేదంటూ కార్యాలయం చుట్టూ తిరుగుతున్న మాధవరావు అనే విశ్రాంత ఉపాధ్యాయుడు, సామాన్యుడిగా ఉన్న ఎమ్మెల్యే వద్ద తన గోడు వెళ్లబోసుకున్నారు. వెంటనే స్పందించిన బాలరాజు తన అసలు గుర్తింపును వెల్లడించి, కార్యాలయ సిబ్బందిపై తీవ్ర ఆగ్రహం వ్యక్తం చేశారు. ప్రజల సమస్యల పరిష్కారంలో నిర్లక్ష్యం వహిస్తే సహించేది లేదని ఆయన హెచ్చరించారు. చిత్తశుద్ధితో బాధ్యతలు నిర్వర్తించి, ప్రజలకు మెరుగైన సేవలు అందించాలని అధికారులను ఆదేశించారు. ఎమ్మెల్యే చేపట్టిన ఈ ఆకస్మిక తనిఖీ ప్రస్తుతం స్థానికంగా చర్చనీయాంశంగా మారింది.