జీతం లేని పనిలో భారతీయులే టాప్.. వారానికి 16 గంటలకు పైగా వెట్టిచాకిరి.. నివేదికలో షాకింగ్ నిజాలు!

పని విషయంలో భారతీయులు ఎంతో కష్టపడతారని పేరుంది. అయితే ఈ కష్టంలో అధిక భాగం జీతం లేకుండానే జరుగుతోందని తాజా అధ్యయనం ఒకటి సంచలన విషయాలను వెల్లడించింది. ఏడీపీ సంస్థ విడుదల చేసిన ‘పీపుల్ ఎట్ వర్క్ 2026’ నివేదిక ప్రకారం, ప్రపంచంలోనే అత్యధికంగా జీతం లేని పని గంటలు నమోదు చేస్తున్న దేశంగా భారత్ నిలిచింది. వారానికి 16 గంటలకు పైగా ఎలాంటి ప్రతిఫలం ఆశించకుండా పనిచేస్తున్న ఉద్యోగులు మన దేశంలోనే ఎక్కువగా ఉన్నారని ఈ రిపోర్ట్ స్పష్టం చేసింది.

భారత్‌లో ప్రతి నలుగురు ఉద్యోగుల్లో ఒకరు (24శాతం) వారానికి 16 లేదా అంతకంటే ఎక్కువ గంటలు ఉచితంగా పనిచేస్తున్నట్లు ఈ అధ్యయనంలో తేలింది. మరో 40శాతం మంది ఉద్యోగులు వారానికి 6 నుంచి 15 గంటల పాటు జీతం లేని అదనపు పని చేస్తున్నారు. అంటే, మన దేశంలోని అధిక శాతం శ్రామిక శక్తి గణనీయమైన సమయాన్ని ఎలాంటి వేతనం లేకుండానే పనికి కేటాయిస్తోంది. ప్రపంచవ్యాప్తంగా చూస్తే ఈ పరిస్థితి భిన్నంగా ఉంది. అంతర్జాతీయంగా కేవలం 12 శాతం మంది మాత్రమే వారానికి 16 గంటలకు పైగా అదనపు పని చేస్తున్నారు.

అయితే, ఎక్కువ గంటలు పనిచేస్తే ఎక్కువ ఫలితాలు వస్తాయనుకుంటే పొరపాటేనని ఈ నివేదిక స్పష్టం చేస్తోంది. అదనపు పనిభారం మోస్తున్న ఉద్యోగులు తాము అనుకున్నంత ఉత్పాదకతను చూపలేకపోతున్నామని అంగీకరించారు. ఇలాంటి వారిలో తీవ్రమైన ఒత్తిడి, ఉద్యోగం మారాలనే ఆలోచనలు కూడా అధికంగా ఉన్నట్లు తేలింది. జీతం లేని పని గంటలు ఎక్కువగా ఉన్నవారు తమ ఉద్యోగంలో నిబద్ధత, సంతృప్తిని పొందుతున్నామని చెబుతున్నప్పటికీ, వారిలో ఉత్పాదకత తక్కువగా ఉండటం, మానసిక శ్రేయస్సు తగ్గడం, కొత్త ఉద్యోగం కోసం వెతికే ధోరణి పెరగడం వంటివి గమనించారు.

ముఖ్యంగా ఇంటి నుంచి పనిచేసే (రిమోట్) ఉద్యోగులు, యువతలోనే ఈ అదనపు పని గంటల ధోరణి ఎక్కువగా కనిపిస్తోంది. ఆఫీసుకు వచ్చి పనిచేసే వారితో పోలిస్తే రిమోట్ వర్కర్లే ఎక్కువ గంటలు ఉచితంగా పనిచేస్తున్నట్లు నివేదిక పేర్కొంది. ఈ గణాంకాలు కంపెనీలకు ఒక హెచ్చరికగా నిలుస్తున్నాయి. ఉద్యోగుల పనితీరును కేవలం హాజరు లేదా లాగిన్ అయిన గంటలతో అంచనా వేయడం సరికాదని నిపుణులు సూచిస్తున్నారు. జీతం లేని పని గంటలు పెరిగేకొద్దీ అది ఉద్యోగుల ఉత్పాదకత, వారి శ్రేయస్సుపై ప్రతికూల ప్రభావం చూపుతుందని, చివరికి వారు కంపెనీని వీడిపోయేందుకు దారితీస్తుందని హెచ్చరిస్తున్నారు.