మీ పిల్లల్లో ఈ లక్షణాలున్నాయా? మధుమేహం కావచ్చు!

చిన్నారుల్లో టైప్-2 డయాబెటిస్ కేసులు నానాటికీ పెరుగుతుండటంపై ఆరోగ్య నిపుణులు తీవ్ర ఆందోళన వ్యక్తం చేస్తున్నారు. మారిన జీవనశైలి, తగ్గిన శారీరక శ్రమ, అనారోగ్యకరమైన ఆహారపు అలవాట్లు, ఊబకాయం వంటివే ఈ పరిస్థితికి ప్రధాన కారణమని స్పష్టం చేస్తున్నారు. ఎన్డీటీవీ కథనం ప్రకారం... పిల్లల్లో ఎక్కువగా టైప్-1 డయాబెటిస్ కనిపిస్తున్నప్పటికీ, జీవనశైలి కారణంగా వచ్చే టైప్-2 కేసులు పెరగడం ఆందోళన కలిగిస్తోంది.

ప్రముఖ కార్డియాలజిస్ట్ డాక్టర్ అలోక్ చోప్రా దీనికి గల కారణాలను వివరిస్తూ, కేవలం చక్కెర పదార్థాలే కాకుండా, అధిక కార్బోహైడ్రేట్లు, తక్కువ ఫైబర్, ప్రోటీన్లు ఉండే ఆహారం కూడా ప్రమాదకరమేనని తెలిపారు. "కెచప్, ఫ్లేవర్డ్ యోగర్ట్‌లు, బ్రేక్‌ఫాస్ట్ తృణధాన్యాలు, ప్యాకేజ్డ్ మిల్క్‌షేక్‌లు, బిస్కెట్ల వంటి ప్రాసెస్డ్ ఫుడ్స్‌లో దాగివుండే చక్కెర వల్ల శరీరంలో గ్లూకోజ్ స్థాయిలు అదుపు తప్పుతాయి. ఇది వారి మానసిక స్థితి, ప్రవర్తన, ఏకాగ్రతపై కూడా ప్రభావం చూపుతుంది" అని ఆయన వివరించారు.

ప్రధాన లక్షణాలు
అతిగా దాహం వేయడం, తరచుగా మూత్రవిసర్జన అసాధారణమైన నీరసం, కంటిచూపు మసకబారడం గాయాలు నెమ్మదిగా మానడం, విపరీతమైన ఆకలి మెడ, చంకల చుట్టూ చర్మం నల్లగా మారడం (ఇన్సులిన్ నిరోధకతకు సంకేతం)

నివారణ మార్గాలు
పిల్లలకు ప్రాసెస్డ్ ఫుడ్, చక్కెర పానీయాలకు బదులుగా పండ్లు, కూరగాయలు, ప్రొటీన్లు అధికంగా ఉండే సంపూర్ణ ఆహారాన్ని అలవాటు చేయాలి. రోజూ కనీసం గంటపాటు వ్యాయామం, ఆటలు ఆడేలా ప్రోత్సహించాలి. స్క్రీన్ సమయాన్ని తగ్గించి, ఆరోగ్య పరీక్షలు చేయించడం ద్వారా ఈ ముప్పును ముందుగానే గుర్తించి నివారించవచ్చని నిపుణులు సూచిస్తున్నారు. డయాబెటిస్‌ను నిర్లక్ష్యం చేస్తే భవిష్యత్తులో గుండె, కిడ్నీ, నరాల సంబంధిత సమస్యలు వచ్చే ప్రమాదం ఉందని హెచ్చరిస్తున్నారు.