మళ్లీ థియేటర్లలో దిగనున్న 'వకీల్ సాబ్'?

రాజకీయాలలోకి వెళ్లిన పవన్ కల్యాణ్, కొంత గ్యాప్ తరువాత 'వకీల్ సాబ్' సినిమాతో రీ ఎంట్రీ ఇచ్చారు. దిల్ రాజు నిర్మాణంలో .. వేణు శ్రీరామ్ దర్శకత్వంలో ఈ సినిమా రూపొందింది. శ్రుతి హాసన్ కథానాయికగా నటించగా, నివేదా థామస్ .. అంజలి .. అనన్య ముఖ్యమైన పాత్రల్లో మెప్పించారు. హిందీలో విజయం సాధించిన 'పింక్'కి రీమేక్ గా ఈ సినిమా వచ్చింది. విడుదలైన ప్రతి ప్రాంతంలోను 'వకీల్ సాబ్' భారీ వసూళ్లను రాబట్టింది. పవన్ రీ ఎంట్రీ ఒక సూపర్ హిట్ మూవీతో జరగడం పట్ల ఆయన అభిమానులంతా కూడా సంతృప్తిని వ్యక్తం చేశారు.

అయితే థియేటర్స్ లో ఈ సినిమా ఒక రేంజ్ లో వసూళ్లను కొల్లగొడుతూ ఉండగా, కరోనా తీవ్రత పెరిగింది. దాంతో థియేటర్స్ దగ్గర జనం పలచబడటం .. ఆ తరువాత థియేటర్లు మూతబడటం జరిగిపోయింది. ఆ తరువాత పెద్ద గ్యాప్ లేకుండానే ఈ సినిమా అమెజాన్ ప్రైమ్ లో వచ్చింది. అయితే ఇప్పుడిప్పుడే కరోనా ప్రభావం తగ్గుతోంది. ఈ నేపథ్యంలో త్వరలో థియేటర్లు తెరుచుకోనున్నాయనే టాక్ వినిపిస్తోంది. ఈ నేపథ్యంలోనే 300 థియేటర్లలో 'వకీల్ సాబ్'ను మళ్లీ రిలీజ్ చేసే ఆలోచనలో దిల్ రాజు ఉన్నాడని అంటున్నారు.