మా సినిమా టాక్ రివర్స్‌లో ఉంది: 'ప్యారడైజ్' విజయంపై నాని

నేచురల్ స్టార్ నాని హీరోగా శ్రీకాంత్ ఓదెల దర్శకత్వంలో వచ్చిన 'ది ప్యారడైజ్' చిత్రంపై ప్రేక్షకులనుంచి వస్తున్న స్పందన చాలా కొత్తగా ఉందని నాని అన్నారు. శనివారం జరిగిన చిత్ర యూనిట్ ప్రెస్ మీట్‌లో ఆయన మాట్లాడుతూ, సాధారణంగా ఉదయం పాజిటివ్ టాక్‌తో మొదలై సాయంత్రానికి మిశ్రమ స్పందన వచ్చే సినిమాలకు భిన్నంగా, తమ సినిమాకు షో షోకి ఆదరణ పెరుగుతోందని చెప్పారు. తమ చిత్రానికి అన్ని చిత్రాలకంటే రివర్స్‌గా మిక్స్డ్ టాక్ వచ్చి, ఆ తర్వాత పాజిటివ్ టాక్ వచ్చిందని అన్నారు.

"ఈ సినిమా విషయంలో నాకు ప్రతిదీ కొత్తగానే అనిపించింది. మేం ఈ సినిమాను రూపొందించిన విధానం, చిత్రీకరణ జరిపిన ప్రదేశాల్లోని పరిస్థితులు, ట్రైలర్ లేకుండానే సినిమాను విడుదల చేయడం, రిలీజ్‌కు ముందు నెలకొన్న ఉత్కంఠ... ఇలా అన్నీ మాకు కొత్త అనుభవాలే. ఒక సరికొత్త సినిమా చేస్తున్నామని, ప్రేక్షకులకు ఒక వినూత్నమైన అనుభూతిని అందిస్తున్నామని బలంగా నమ్మాం. అయితే, ప్రేక్షకుల నుంచి స్పందన కూడా ఇంత కొత్తగా, ఇంత అద్భుతంగా ఉంటుందని మేము ఊహించలేదు. ఇది నాకు వ్యక్తిగతంగా ఎప్పటికీ గుర్తుండిపోయే ఒక ప్రత్యేకమైన అనుభవం.

నేను ఇండస్ట్రీకి వచ్చి ఎన్నో సినిమాలు చేశాను. ఈ మధ్యకాలంలో నేను గమనిస్తున్నదేమిటంటే, సినిమాలు విడుదలైన రోజు ఉదయం చాలా పాజిటివ్ స్పందనతో మొదలవుతాయి. కానీ, సాయంత్రానికి వచ్చేసరికి ఆ టాక్ కాస్తా మిక్స్‌డ్‌గా మారిపోతుంది. మా ‘ప్యారడైజ్’ సినిమా విషయంలో దీనికి పూర్తి భిన్నంగా జరిగింది. విడుదల రోజున ప్రీమియర్ షోలతో ఒకరకమైన స్పందనతో మొదలై, ఆ తర్వాత ప్రదర్శించే ప్రతి షోతో పాజిటివిటీ పెరుగుతూ వచ్చింది. ప్రేక్షకుల నుంచి ఆదరణ అంతకంతకూ మెరుగవుతూ వచ్చింది. ఈ మధ్య కాలంలో ఒక సినిమాకు ఇలాంటి అద్భుతమైన స్పందన రావడం నేను చూడలేదు.

మేమందరం చాలా నిబద్ధతతో, అంకితభావంతో ఈ సినిమా చేశాం. ప్రారంభంలో రకరకాల స్పందనలు వచ్చినప్పుడు వాటన్నిటినీ స్వీకరించాం. ఇప్పుడు ప్రేక్షకులు ఇంతగా ప్రేమను కురిపిస్తున్నప్పుడు, ఆ ఆదరణను, వారి ప్రేమను అంతే గౌరవంగా స్వీకరించాల్సిన సమయం వచ్చింది. ప్రతి ఒక్కరూ ఈ సినిమాను తమ సొంత సినిమాగా భావించి, అందులోని చిన్నచిన్న సందర్భాలను కూడా ఆస్వాదిస్తూ, వాటిని సెలబ్రేట్ చేసుకుంటుంటే మాకు చాలా సంతోషంగా అనిపించింది. తెలుగు ప్రేక్షకుల రుణం నేను ఎప్పటికీ తీర్చుకోలేను. వారు తమ అభిప్రాయాలను చాలా నిజాయితీగా, నిర్మొహమాటంగా చెబుతారు. అలాంటి గొప్ప ప్రేక్షకులు ఉన్నంతకాలం తెలుగు సినిమా ఉన్నత స్థాయిలో ఉంటుంది.

మా చిత్ర బృందంలోని ప్రతి ఒక్కరికీ పేరుపేరునా ధన్యవాదాలు తెలియజేస్తున్నాను. ‘ప్యారడైజ్’ ఒక హీరో సినిమా కాదు. ఈ సినిమా కోసం కేవలం హీరోనే ఎక్కువగా కష్టపడ్డాడని ఎవరూ చెప్పలేరు. ఎందుకంటే, ఈ చిత్రంలో చిన్న పాత్రలు పోషించిన వారి నుంచి ప్రతి ఒక్కరూ ఎంత కష్టపడ్డారో నేను దగ్గరుండి చూశాను. వర్షంలో తడుస్తూ రోజుల తరబడి ఈ సినిమాను నమ్మి పనిచేశారు. మీరందరూ ‘ప్యారడైజ్’ చిత్రానికి నిజమైన హీరోలు. ప్రతి పాత్రధారి, ప్రతి కళాకారుడు, ప్రతి సాంకేతిక నిపుణుడు, ప్రతి అసిస్టెంట్ డైరెక్టర్... అందరూ నిద్రలేని రాత్రులు గడిపి పనిచేశారు. మీ కష్టానికి నా హ్యాట్సాఫ్.

అనిరుధ్ అద్భుతమైన సంగీతం అందించాడు. అతను ఇచ్చిన సంగీతం వల్లే తెలుగు రాష్ట్రాల్లోని ప్రేక్షకులు థియేటర్లకు తరలివచ్చారు. సాయి ఈ సినిమాకి ఎంతో సమయం కేటాయించి కష్టపడ్డాడు. ఈ సినిమాను చిత్రీకరించడం అంత సులభం కాదు. అవినాష్ గారు ఎంతో శ్రమించి అద్భుతమైన సెట్స్ వేశారు. అలాగే ఎడిటర్ నవీన్ కూడా చాలా హార్డ్‌వర్క్ చేశాడు. సంపూ ఒక బ్యూటిఫుల్ హ్యూమన్ బీయింగ్, చాలా మంచివాడు. సవారి గ్యాంగ్‌లో నటించిన వాళ్లందరూ అద్భుతంగా చేశారు. మా స్టంట్, డాన్స్ కొరియోగ్రాఫర్లు కూడా అద్భుతంగా పనిచేశారు. ఈ సినిమాలోని భావోద్వేగాన్ని కాసర్ల శ్యామ్ గారు తన సాహిత్యంలో అద్భుతంగా పలికించారు. సుధాకర్ గారిని మేము చాలా ఇబ్బంది పెట్టాం. కానీ, ఆయన మా అందరినీ బలంగా నమ్మారు. షూటింగ్ సమయంలో ఎదురైన ఎన్నో సమస్యలకు ఆయన అండగా నిలబడ్డారు. ఆయన ఫిల్మోగ్రఫీలో ‘ప్యారడైజ్’ ఒక ప్రత్యేక చిత్రంగా నిలిచిపోతుంది.

ప్రియదర్శి చేసిన శంకరన్న పాత్రకు అద్భుతమైన స్పందన వస్తోంది. ప్రియదర్శి ఒక టెర్రిఫిక్ పెర్ఫార్మర్. కయాదు లోహర్ పోషించిన 'సుబ్బు' లాంటి పాత్ర చేయడం చాలా కష్టం, కానీ తను అద్భుతంగా చేసింది. ఇక మా అందరి ఫేవరెట్ మోహన్ బాబు గారు. నాకు చిన్నప్పటి నుంచి ఆయన నటన అంటే ఎంతో ఇష్టం. ‘అసెంబ్లీ రౌడీ’, ‘పెదరాయుడు’ నా ఫేవరెట్ సినిమాలు. ఆయనతో కలిసి పనిచేసిన తర్వాతే ఆయన ఎంత గొప్ప వ్యక్తి అనేది నాకు అర్థమైంది. ఆయనతో దగ్గరగా పనిచేస్తే ఎవరైనా ఆయనతో ప్రేమలో పడిపోతారు. ఈ సినిమాకు హీరో పైన ఉన్న హీరో ఆయనే. దర్శకుడు శ్రీకాంత్ ఒక ఒరిజినల్ పీస్, అతని గురించి మాటల్లో చెప్పలేను.

ఈ సినిమా విడుదల తర్వాత వచ్చిన స్పందన ఒక తుపానులా ఉంది. ఎక్కడికి వెళ్లినా, ఎవరిని కలిసినా ఒకటే టాపిక్... ‘ప్యారడైజ్’ విజయం. 2026లో అత్యధికంగా వినిపించిన సినిమా ‘ప్యారడైజ్’. ఈ విజయాన్ని మాకు అందించిన ప్రతి ఒక్కరికీ పేరుపేరునా నా హృదయపూర్వక ధన్యవాదాలు" అంటూ నాని తన స్పీచ్ ముగించారు.

ఈ కార్యక్రమంలో నటులు ప్రియదర్శి, సంపూర్ణేశ్ బాబు కూడా పాల్గొని తమ పాత్రలకు వస్తున్న స్పందన పట్ల సంతోషం వ్యక్తం చేశారు.