చిత్తుగా ఓడాక సంబరాలా?.. ఇదేం మనస్తత్వం: పాక్ జట్టుపై అక్రమ్ ఫైర్!

ఇంగ్లండ్ పర్యటనలో టెస్టు సిరీస్‌ను 3-0 తేడాతో అత్యంత ఘోరంగా కోల్పోయిన పాకిస్థాన్ జట్టుపై, అభిమానుల తీరుపై ఆ దేశ దిగ్గజ ఫాస్ట్ బౌలర్ వసీం అక్రమ్ తీవ్ర అసహనం, ఆగ్రహం వ్యక్తం చేశాడు. ఓటమిని మరిచి అరంగేట్ర ఆటగాడి వ్యక్తిగత ప్రదర్శనకు సంబరాలు చేసుకోవడం, 'సగటు ప్రదర్శనను అంగీకరించే మనస్తత్వాన్ని' సూచిస్తోందని ఘాటుగా విమర్శించాడు.

ఇంగ్లండ్‌తో జరిగిన మూడు టెస్టుల సిరీస్‌లో పాకిస్థాన్ కనీస పోటీ కూడా ఇవ్వలేకపోయింది. తొలి టెస్టులో ఇన్నింగ్స్ 103 పరుగులతో, రెండో టెస్టులో 194 పరుగులతో, మూడో టెస్టులో 8 వికెట్ల తేడాతో చిత్తుగా ఓడిపోయింది. తొలి రెండు మ్యాచ్‌ల తర్వాత ఏకంగా ఏడుగురు ఆటగాళ్లను, ఇద్దరు కోచ్‌లను జట్టు నుంచి తొలగించారు. 

ఈ క్రమంలో చివరి టెస్టు కోసం 21 ఏళ్ల యువ ఫాస్ట్ బౌలర్ రజావుల్లాకు అవకాశం దక్కింది. మార్దాన్‌కు చెందిన ఈ యువకుడు, తన అరంగేట్ర మ్యాచ్‌లోనే ఇంగ్లండ్ తొలి ఇన్నింగ్స్‌లో జో రూట్ వికెట్‌తో సహా 4 వికెట్లు పడగొట్టాడు. అనంతరం బ్యాటింగ్‌లో కేవలం 63 బంతుల్లో 9 సిక్సర్లతో 81 పరుగులు చేసి ఆకట్టుకున్నాడు.

సిరీస్ ముగిసి స్వదేశానికి తిరిగి వచ్చిన రజావుల్లాకు ఇస్లామాబాద్‌లో వేలాది మంది అభిమానులు, మీడియా ఘనస్వాగతం పలికారు. సోషల్ మీడియాలో అతడిని "తదుపరి వకార్ యూనిస్" అంటూ కొనియాడారు. అయితే, ఈ సంబరాల వాతావరణంపై వసీం అక్రమ్ మండిపడ్డాడు.

వకార్ యూనిస్‌తో కలిసి ఓ స్వచ్ఛంద కార్యక్రమంలో పాల్గొన్న అక్రమ్ మాట్లాడుతూ.. "కనీసం ముఖం దాచుకుని వెళ్లాలి. మీ ఇంట్లో సంబరాలు చేసుకోండి. మనం ఇంగ్లండ్ చేతిలో మాములుగా ఓడిపోలేదు, చిత్తుగా ఓడిపోయాం. అలాంటిది ఇస్లామాబాద్‌లో 5,000 మంది అతనికి స్వాగతం పలికారు. ఇది మన మనస్తత్వాన్ని తెలియజేస్తుంది. మనం సగటు ప్రదర్శనను ఆస్వాదించడం అలవాటు చేసుకున్నాం" అని తీవ్ర ఆవేదన వ్యక్తం చేశాడు. 

కేవలం ఆటగాళ్లు, కోచ్‌లను మార్చినంత మాత్రాన ప్రయోజనం లేదని, జట్టు వ్యవస్థలో, ఆటగాళ్ల మనస్తత్వంలో మార్పు రావాల్సిన అవసరం ఉందని అక్రమ్ స్పష్టం చేశాడు.