ఏఐలో కొత్త ట్రెండ్.. ఏజెంటిక్ ఏఐ ఉద్యోగాలకు విపరీతమైన గిరాకీ

భారత టెక్నాలజీ రంగంలో సరికొత్త ఆర్టిఫిషియల్ ఇంటెలిజెన్స్ (ఏఐ) నైపుణ్యాలకు విపరీతమైన డిమాండ్ ఏర్పడింది. ముఖ్యంగా ఏజెంటిక్ ఏఐ, ప్రత్యేక జనరేటివ్ ఏఐ స్కిల్స్ ఉన్న నిపుణుల కోసం కంపెనీలు పెద్ద ఎత్తున వెతుకుతున్నాయి. అయితే, డిమాండ్‌కు తగినంతగా నిపుణులు అందుబాటులో లేకపోవడంతో 50 శాతానికి పైగా నైపుణ్యాల కొరత ఏర్పడిందని ప్రముఖ బిజినెస్ సేవల సంస్థ క్వెస్ కార్ప్ తన నివేదికలో వెల్లడించింది. ఈ విభాగంలో ఉద్యోగాలు ఏటా 35 నుంచి 40 శాతం చొప్పున వృద్ధి చెందుతాయని అంచనా వేసింది.

ఏజెంటిక్ ఏఐ అనేది స్వయంగా నిర్ణయాలు తీసుకుని, నిర్దేశించిన పనులను పూర్తి చేయగల అధునాతన టెక్నాలజీ. దేశంలోని 28,000కు పైగా ఉద్యోగ ప్రకటనలను విశ్లేషించి "భారత వర్క్‌ఫోర్స్ ఏజెంటిక్ ఏఐ శకానికి సిద్ధంగా ఉందా?" అనే పేరుతో క్వెస్ కార్ప్ ఈ నివేదికను రూపొందించింది. కంపెనీలు ఇప్పటివరకు ప్రయోగాత్మకంగా ఉన్న జెన్‌ఏఐ పైలట్ ప్రాజెక్టుల నుంచి ఉత్పత్తి స్థాయి ఆటోమేటెడ్ వర్క్‌ఫ్లోల వైపు మళ్లుతుండటమే ఈ డిమాండ్‌కు ప్రధాన కారణమని నివేదిక పేర్కొంది.

ఈ నివేదిక ప్రకారం ప్రస్తుతం ఏజెంటిక్ ఏఐ ఉద్యోగాల నియామకాల్లో గ్లోబల్ క్యాపబిలిటీ సెంటర్లు (GCC) 54 శాతం వాటాతో ముందున్నాయి. మొత్తం నియామకాల్లో 70 శాతానికి పైగా మధ్య, ఉన్నత స్థాయి (mid-senior) అనుభవజ్ఞులకే అవకాశాలు దక్కుతున్నాయి. ఈ విభాగంలో సీనియర్ ఆర్కిటెక్చర్, సేఫ్టీ నిపుణులకు 20 నుంచి 28 శాతం వరకు అధిక వేతనాలు లభిస్తున్నాయి. 2024లో 276 మిలియన్ డాలర్లుగా ఉన్న భారత ఏజెంటిక్ ఏఐ మార్కెట్, 2030 నాటికి 3.5 బిలియన్ డాలర్లకు చేరుతుందని అంచనా. ఈ నైపుణ్యాల కొరతను అధిగమించేందుకు కంపెనీలు అంతర్గత నియామకాలు, రిమోట్ వర్కింగ్ విధానాలపై దృష్టి సారిస్తున్నాయి.