బాలకృష్ణ 'అఖండ-2' నుంచి 'తాండవం' సాంగ్ ఇదిగో... ఫ్యాన్స్ కు పూనకాలే!

నందమూరి బాలకృష్ణ, మాస్ డైరెక్టర్ బోయపాటి శ్రీను కాంబినేషన్‌లో వస్తున్న 'అఖండ 2' సినిమా నుంచి అభిమానులు ఎంతో ఆసక్తిగా ఎదురుచూస్తున్న అప్డేట్ వచ్చేసింది. ఈ చిత్రం నుంచి 'తాండవం' పేరుతో ఓ పవర్‌ఫుల్ పాటను చిత్రబృందం శుక్రవారం విడుదల చేసింది. విడుదలైన కాసేపటికే ఈ పాట సోషల్ మీడియాలో ట్రెండింగ్‌గా మారి, సినిమాపై అంచనాలను మరింత పెంచింది.

ఈ పాటకు స్టార్ మ్యూజిక్ డైరెక్టర్ తమన్ అందించిన సంగీతం ప్రధాన ఆకర్షణగా నిలిచింది. కల్యాణ్ చక్రవర్తి రాసిన పవర్‌ఫుల్ సాహిత్యానికి, ప్రముఖ గాయకులు శంకర్ మహాదేవన్, కైలాశ్ ఖేర్, దీపక్ బ్లూ తమ గాత్రంతో ప్రాణం పోశారు. పాటలోని యాక్షన్ సన్నివేశాలు, బాలకృష్ణ ఎనర్జిటిక్ లుక్స్ అభిమానులను విశేషంగా ఆకట్టుకుంటున్నాయి.

గతంలో సంచలన విజయం సాధించిన 'అఖండ'కు సీక్వెల్‌గా ఈ చిత్రం తెరకెక్కుతోంది. 14 రీల్స్ ప్లస్ పతాకంపై రామ్ ఆచంట, గోపి ఆచంట ఈ సినిమాను భారీ స్థాయిలో నిర్మిస్తున్నారు. బాలకృష్ణ చిన్నకుమార్తె యం. తేజస్విని సమర్పకురాలిగా వ్యవహరిస్తున్నారు. 

'అఖండ 2' చిత్రాన్ని ఈ ఏడాది డిసెంబర్ 5న ప్రపంచవ్యాప్తంగా విడుదల చేసేందుకు నిర్మాతలు సన్నాహాలు చేస్తున్నారు. తాజాగా విడుదల చేసిన తాండవం పాటతో ప్రచార కార్యక్రమాలను వేగవంతం చేసిన చిత్రబృందం, త్వరలోనే మరిన్ని అప్డేట్స్ ఇవ్వనుంది.