'క్లాప్' నుంచి ఇళయరాజా సాంగ్ రిలీజ్!

మొదటి నుంచి కూడా ఆది పినిశెట్టి విభిన్నమైన .. విలక్షణమైన పాత్రలను చేస్తూ వస్తున్నాడు. ఒక వైపున హీరోగా చేస్తూనే, మరో వైపున విలన్ పాత్రలతోను మెప్పిస్తున్నాడు. తాజాగా ఆయన హీరోగా చేసిన సినిమానే 'క్లాప్'. ఈ సినిమాలో కథానాయికలుగా ఆకాంక్ష సింగ్ .. కురుప్ క్రిష కనిపించనున్నారు.

రామాంజనేయులు - రాజశేఖర్ రెడ్డి సంయుక్తంగా నిర్మించిన ఈ సినిమాకి, పృథ్వీ ఆదిత్య దర్శకత్వం వహించాడు. ఇళయరాజా సంగీతాన్ని అందించడమే కాకుండా ఆయనే ఈ సినిమాలో ఒక పాట కూడా పాడారు. ఇప్పుడు ఆ పాటనే లిరికల్ వీడియోగా వదిలారు.

'మనసుతో చూడలేని మార్గమే లేదురా .. కలలు ఉప్పొంగిపోని కన్ను నిరుపేదరా' అంటూ ఈ పాట సాగుతోంది. ఈ సినిమా స్పోర్ట్స్ నేపథ్యంలో నడుస్తుంది. తన తనయుడి వెన్నుతట్టి ప్రోత్సహిస్తూ .. ఆశయం దిశగా అతనిని నడిపిస్తూ ఒక తండ్రి పాడుతున్నట్టుగా వచ్చే పాట ఇది. త్వరలోనే ఈ సినిమా ప్రేక్షకుల ముందుకు రానుంది.