'క్రాక్' సినిమా కథ ముందు బాలకృష్ణ వద్దకే వెళ్లిందట!

రవితేజ కథానాయకుడిగా గోపీచంద్ మలినేని దర్శకత్వంలో 'క్రాక్' సినిమా తెరకెక్కింది. లాక్ డౌన్ తరువాత వచ్చిన సినిమాల్లో అత్యధిక వసూళ్లను రాబట్టిన చిత్రంగా ఇది నిలిచింది. మాస్ యాక్షన్ ఎపిసోడ్స్ ఈ సినిమాకి హైలైట్ గా నిలిచాయి. తాజాగా ఈ సినిమా గురించిన విషయం ఒకటి వెలుగులోకి వచ్చింది. అదేమిటంటే, ఈ కథ ముందుగా బాలకృష్ణ దగ్గరికి వెళ్లిందట. అయితే కొన్ని కారణాల వలన ఆయనతో ఈ ప్రాజెక్టు పట్టాలెక్కలేదు. దాంతో గోపీచంద్ మలినేని, హీరో బాడీ లాంగ్వేజ్ ను రవితేజకు తగినట్టుగా మార్చుకుని ఆయనను బరిలోకి దింపాడట.

గోపీచంద్ మలినేని - రవితేజ మధ్య మంచి సాన్నిహిత్యం ఉంది. ఈ ఇద్దరి కాంబినేషన్లో 'డాన్ శీను' .. 'బలుపు' సినిమాలు వచ్చాయి. ఈ రెండు సినిమాలు కూడా మాస్ ఆడియన్స్ ను విపరీతంగా ఆకట్టుకున్నాయి. దాంతో సహజంగానే 'క్రాక్' పై కూడా అంచనాలు పెరుగుతూ వచ్చాయి. కథాకథనాల్లో దమ్ము ఉండటంతో ఈ సినిమా అంచనాలను అందుకోగలిగింది .. హిట్టు తెచ్చుకోగలిగింది. బాలకృష్ణతో 'క్రాక్' చేయలేకపోయిన కారణంగానే, గోపీచంద్ మలినేని ఆ తరువాత సినిమాను ఆయనతోనే పట్టాలెక్కిస్తున్నాడట.