కోల్ కతాలో ఇండియాలో తొలి అండర్ వాటర్ మెట్రో మార్గం... వీడియో ఇదిగో!

ఇండియాలో తొలి అండర్ వాటర్ మెట్రో స్టేషన్ కోల్ కతాలో త్వరలో ప్రారంభం కానుందని రైల్వే శాఖ మంత్రి పీయుష్ గోయల్ తెలిపారు. అందుకు సంబంధించిన వీడియోను కూడా ఆయన పంచుకున్నాడు. ఈ మేరకు తన ట్విట్టర్ ఖాతాలో ఓ పోస్ట్ పెడుతూ, కోల్‌ కతా హుగ్లీ నది కింద తొలి అండర్‌ వాటర్‌ రైలు నడుస్తుందని తెలిపారు. అద్భుతమైన ఇంజనీరింగ్‌ కు ఇదొక ప్రత్యక్ష ఉదాహరణని, ఇండియాలో రైల్వేల పురోగతికి ఇది చిహ్నంగా నిలుస్తుందని అన్నారు. ఈ రైలు సేవలతో నగర ప్రజలు మరింత సౌకర్యవంతంగా, మరింత వేగంగా తమ గమ్యానికి చేరుతారని, ఇది దేశం గర్వపడే విషయమని వ్యాఖ్యానించారు.

కాగా, ఈ రైల్వే స్టేషన్ కోల్‌ కతా మెట్రో లైన్-2 కిందకు వస్తుంది. సాల్ట్ లేక్ సెక్టార్ 5 స్టేషన్‌ ను సాల్ట్ లేక్ స్టేడియం స్టేషన్‌ తో కలుపుతూ 5 కిలోమీటర్ల మేరకు నిర్మించిన ట్రాక్ లో భాగంగా, 30మీటర్ల లోతులో 520 మీటర్ల పొడవైన రెండు సొరంగాలు ఉంటాయి.  జర్మనీ నుంచి తెప్పించిన రచ్నా,  ప్రేర్నా అనే  టన్నెల్ బోరింగ్ యంత్రాలు ఈ సొరంగాన్ని నిర్మించాయి. లోపలికి నీరు లీక్ కాకుండా ఉండేందుకు నాలుగంచెల రక్షణ ఏర్పాట్లను చేశారు.