ఇవాళ రాలేకపోతున్నాను: ఈడీ అధికారులకు మహేశ్ బాబు లేఖ

ప్రముఖ సినీ నటుడు మహేశ్ బాబు, ఎన్‌ఫోర్స్‌మెంట్ డైరెక్టరేట్ (ఈడీ) విచారణకు నేడు హాజరు కాలేదు. సాయి సూర్య డెవలపర్స్ అనే రియల్ ఎస్టేట్ సంస్థకు సంబంధించిన ఆర్థిక లావాదేవీల వ్యవహారంలో మహేశ్ బాబు ఇవాళ ఈడీ ఎదుట విచారణకు హాజరు కావాల్సి ఉంది. అయితే, ముందుగా నిర్ణయించిన షెడ్యూల్ ప్రకారం ఆయన బషీర్‌బాగ్‌లోని ఈడీ కార్యాలయానికి రాలేదు. ఈ మేరకు తాను రాలేకపోవడానికి గల కారణాలను వివరిస్తూ మహేశ్ బాబు ఈడీ అధికారులకు లేఖ రాశారు.

వివరాల్లోకి వెళితే, సాయి సూర్య డెవలపర్స్, సురానా గ్రూప్ కంపెనీలకు మహేశ్ బాబు బ్రాండ్ అంబాసిడర్‌గా వ్యవహరించారు. ఈ సంస్థల ప్రమోషన్ల కోసం ఆయనకు భారీ మొత్తంలో పారితోషికం అందినట్లు ఈడీ గుర్తించినట్లు సమాచారం. చెక్కుల రూపంలో రూ. 3.4 కోట్లు, నగదు రూపంలో రూ. 2.5 కోట్లు, మొత్తం కలిపి రూ. 5.90 కోట్లు ఆయన స్వీకరించారని ఈడీ వర్గాలు భావిస్తున్నాయి. మనీ లాండరింగ్ ఆరోపణలు ఎదుర్కొంటున్న ఈ సంస్థల్లో పెట్టుబడులు పెట్టేలా ప్రజలను ప్రోత్సహించారనే ఆరోపణల నేపథ్యంలో, ఈ నెల 22న ఈడీ అధికారులు మహేశ్ బాబుకు నోటీసులు జారీ చేశారు.

ఈ నోటీసుల ప్రకారం, మహేశ్ బాబు ఏప్రిల్ 27వ తేదీ ఉదయం 10:30 గంటలకు బషీర్‌బాగ్‌లోని ఈడీ కార్యాలయంలో విచారణ అధికారి ముందు హాజరు కావాల్సి ఉంది. అయితే, ఆయన విచారణకు హాజరుకాలేదు. తాను హాజరు కాలేకపోవడానికి గల కారణాలను వివరిస్తూ మహేశ్ బాబు ఈడీకి ఒక లేఖ రాశారు.

ప్రస్తుతం తాను ఒక సినిమా షూటింగ్‌లో చాలా బిజీగా ఉన్నానని, అందువల్ల నేడు విచారణకు రాలేకపోయానని మహేశ్ బాబు తన లేఖలో పేర్కొన్నారు. రేపు కూడా షూటింగ్ షెడ్యూల్ ఉన్నందున, విచారణకు హాజరయ్యేందుకు తనకు మరో తేదీని కేటాయించాలని ఆయన ఈడీ అధికారులను కోరారు. మహేశ్ బాబు అభ్యర్థనపై ఈడీ అధికారులు ఏ విధంగా స్పందిస్తారనేది వేచి చూడాలి.

ప్రస్తుతం మహేశ్ బాబు దర్శకధీరుడు రాజమౌళి డైరెక్షన్ లో ఎస్ఎస్ఎంబీ29 చిత్రంలో నటిస్తున్న సంగతి తెలిసిందే. ఈ చిత్రం అంతర్జాతీయ స్థాయిలో తెరకెక్కుతోంది. మహేశ్ సరసన ప్రియాంక చోప్రా నటిస్తున్న ఈ చిత్రం కోసం ప్రపంచ స్థాయి టెక్నీషియన్లు పనిచేస్తున్నారు.