బాలకృష్ణ, బోయపాటి టైటిల్ ఖరారు... సోషల్ మీడియాలో లీక్!

నందమూరి బాలకృష్ణతో 'సింహా', 'లెజండ్' వంటి సూపర్ హిట్ చిత్రాలను నిర్మించిన బోయపాటి శ్రీను నిర్మిస్తున్న హ్యాట్రిక్ చిత్రం, వర్కింగ్ టైటిల్ 'బీబీ 3' కాగా, ఈ సినిమాకు ఇప్పటికే పలు పేర్లు వినిపించాయి. తాజాగా, మరో పేరు టాలీవుడ్ వర్గాల్లో మారుమోగుతోంది. ప్రస్తుతం ఈ సినిమా షూటింగ్ లాక్ డౌన్, కరోనా కారణంగా వాయిదా పడగా, త్వరలోనే తిరిగి సినిమా షూటింగ్ ను ప్రారంభించేందుకు ఏర్పాట్లు జరుగుతున్నాయి. తొలుత ఈ చిత్రానికి 'డేంజర్' అనే టైటిల్ ను పరిశీలిస్తున్నారని వార్తలు వచ్చాయి.

కాగా, ఇప్పుడు మరో కొత్త పేరు వినిపిస్తోంది. దీనికి 'టార్చ్ బేరర్' అనే పేరును బోయపాటి ఖరారు చేసినట్టు సినీ వర్గాలు అంటున్నాయి. ఈ పేరు బయటకు రాగానే సోషల్ మీడియాలో వైరల్ అయింది. ఈ విషయంలో చిత్ర యూనిట్ స్పందిస్తేనే అధికారిక సమాచారం తెలుస్తుంది. ఇక ఇదే టైటిల్ కన్ఫార్మ్ చేస్తారా? మరో కొత్త పేరు తెరపైకి వస్తుందా? అన్న విషయం తెలియాలంటే మరికొంతకాలం వేచి చూడాల్సిందే.