కార్తికేయ హీరోగా '90 ML' .. టీజర్ వచ్చేస్తోంది

కార్తికేయ కథానాయకుడిగా చేసిన 'ఆర్ ఎక్స్ 100' యూత్ లో ఆయనకి మంచి క్రేజ్ తెచ్చిపెట్టింది. అయితే ఆ తరువాత హీరోగా ఆయన చేసిన సినిమాలేవీ అంతగా ఆడలేదు. ఈ నేపథ్యంలో ఇటీవల 'నానీస్ గ్యాంగ్ లీడర్' సినిమాలోని విలన్ పాత్ర మాత్రం ఆయనకి మంచి పేరు తెచ్చిపెట్టింది.

తాజాగా హీరోగా అయన మరో సినిమా చేస్తున్నాడు. శేఖర్ రెడ్డి దర్శకత్వం వహిస్తోన్న ఈ సినిమాకి '90 ML' అనే టైటిల్ ను ఖరారు చేశారు. అశోక్ గుమ్మకొండ నిర్మిస్తోన్న ఈ సినిమా నుంచి ఈ నెల 21వ తేదీన ఉదయం 10 గంటల 35 నిమిషాలకి ఫస్టు టీజర్ ను రిలీజ్ చేయనున్నారు. అందుకు సంబంధించిన పోస్టర్ ను తాజాగా విడుదల చేశారు. టీజర్ తోనే సినిమాపై అంచనాలు పెంచే దిశగా కసరత్తు జరుగుతోంది. అనూప్ రూబెన్స్ ఈ సినిమాకి సంగీతాన్ని అందిస్తున్నాడు.