షూటింగులో ఉండగా ఓ అనుకోని సంఘటన జరిగింది: నటి సుధ

తాజాగా 'ఆలీతో సరదాగా' కార్యక్రమంలో పాల్గొన్న సుధ .. అనుకోకుండా జరిగిన ఒక సంఘటనను గురించి ప్రస్తావించారు. " ఒక రోజున కోఠి .. ఉమెన్స్ కాలేజ్ లో 'క్లాస్ మేట్స్' సినిమా షూటింగ్ జరుగుతోంది. 20 యేళ్ల లోపు వయసు గల ఓ అమ్మాయి కాలేజ్ లో అడ్మిషన్ కోసం అమ్మమ్మతో కలిసి వచ్చింది. సీన్ చేసేసి వచ్చి నేను నా చైర్లో కూర్చున్నాను. అంతే .. ఆ అమ్మాయి పరిగెత్తుకుంటూ వచ్చి నన్ను ఆలింగనం చేసుకుని వెక్కి వెక్కి ఏడవడం మొదలుపెట్టింది.

విషయమేమిటో అర్థంకాక నేను షాక్ అయ్యాను. ఎవరీ అమ్మాయి .. ఎందుకిలా చేస్తోంది అని అనడంతో అంతలో ఆ అమ్మాయి వాళ్ల అమ్మమ్మ అక్కడికి వచ్చింది. ఆ అమ్మాయి వాళ్ల అమ్మ అప్పటికి నాలుగు నెలల క్రితం యూఎస్ లో యాక్సిడెంట్ లో చనిపోయిందట. ఆమె ఫోటోను నాకు చూపించారు .. అచ్చు ఆమె నా మాదిరిగానే వుంది. మనిషిని పోలిన మనుషులు వుంటారనే విషయాన్ని కూడా నేను అప్పటి నుంచే నమ్మడం మొదలుపెట్టాను. నేను అచ్చంగా వాళ్ల అమ్మలా ఉండటంతో ఆ అమ్మాయి దుఃఖం ఆపుకోలేక అలా చేసింది పాపం" అని చెప్పుకొచ్చారు.