'అజ్ఞాతవాసి' ట్రైలర్ రిలీజ్ వాయిదా?

త్రివిక్రమ్ దర్శకత్వంలో పవన్ హీరోగా చేస్తోన్న 'అజ్ఞాతవాసి' సినిమా విడుదలకి ముస్తాబవుతోంది. సంక్రాంతి కానుకగా జనవరి 10వ తేదీన ఈ సినిమాను విడుదల చేయనున్నారు. పవన్ పాడిన 'కొడుకా కోటేశ్వర రావు ..' అనే పాటను ఈ నెల 31వ తేదీ రాత్రి రిలీజ్ చేయనున్నారు. ఈ పాట కోసం పవన్ అభిమానులంతా ఎంతో ఆత్రుతతో ఎదురుచూస్తున్నారు.

 ఈ నేపథ్యంలో జనవరి 1వ తేదీన ఈ సినిమా టీజర్ ను రిలీజ్ చేయాలనుకున్నారు. అయితే ఇప్పుడు ఆ నిర్ణయాన్ని మార్చుకున్నట్టుగా తెలుస్తోంది. ఆ రోజున 'నా పేరు సూర్య' టీజర్ వస్తుండటం వలన, 'అజ్ఞాతవాసి' టీజర్ ను ఆపుతున్నట్టుగా చెబుతున్నారు.

డిసెంబర్ 31న పవన్ పాటను రిలీజ్ చేసి .. ఆ మరుసటి రోజునే టీజర్ ను వదలడం కూడా కరెక్ట్ కాదని అనుకుంటున్నారట. పాట వైపు నుంచి అందరి దృష్టిని వెంటనే టీజర్ వైపు మళ్లించినట్టు అవుతుందని భావిస్తున్నారని సమాచారం. అందువలన టీజర్ ను జనవరి 4 లేదా 5వ తేదీల్లో విడుదల చేయాలని నిర్ణయించుకున్నట్టుగా తెలుస్తోంది.