అతడి కష్టం నాకే తెలుసు... రిషభ్ పంత్కు అండగా నిలిచిన యువరాజ్
- ఫామ్లో లేని రిషభ్ పంత్కు అండగా నిలిచిన యువరాజ్ సింగ్
- ప్రమాదం తర్వాత పంత్ మానసిక స్థితిని ఎవరూ అర్థం చేసుకోలేరన్న యువీ
- పంత్ అనుభవాన్ని తన క్యాన్సర్ పోరాటంతో పోల్చిన మాజీ ఆల్రౌండర్
- ఢిల్లీ క్యాపిటల్స్తో మ్యాచ్లో విఫలమవడంతో పంత్పై తీవ్ర విమర్శలు
స్పోర్ట్స్ తక్తో మాట్లాడుతూ యువరాజ్ కీలక వ్యాఖ్యలు చేశాడు. "పంత్ ప్రాణాంతక ప్రమాదం నుంచి బయటపడ్డాడు. నేను కూడా అలాంటి అనుభవాన్నే ఎదుర్కొన్నాను. కాబట్టి అతని పరిస్థితిని నేను అర్థం చేసుకోగలను. ప్రస్తుతం అతని మానసిక స్థితి ఎలా ఉందో చాలా మందికి అర్థం చేసుకోవడం కష్టం" అని యువరాజ్ అభిప్రాయపడ్డాడు. పంత్ ఎదుర్కొంటున్న కష్టాలను సామాన్యులు అర్థం చేసుకోలేరని యువీ పేర్కొన్నాడు.
గత రెండేళ్లుగా పంత్ ఎన్నో ఇబ్బందులు పడ్డాడని, కారు ప్రమాదం తర్వాత పలు గాయాలు, సైడ్ స్ట్రెయిన్, ఫుట్ ఫ్రాక్చర్ వంటివి అతడిని వేధించాయని యువరాజ్ తెలిపాడు. వీటివల్ల తన రిథమ్, ఆత్మవిశ్వాసం దెబ్బతిన్నాయని వివరించాడు. ఈ ఐపీఎల్ సీజన్కు ముందు యువరాజ్ వద్ద పంత్ శిక్షణ తీసుకున్నాడు. ఆ సమయంలో తమ మధ్య కీలక సంభాషణలు జరిగాయని అన్నాడు. పంత్ తన తప్పుల నుంచి నేర్చుకుని, ముఖ్యంగా వైట్-బాల్ క్రికెట్లో రాణించాలని తపనతో ఉన్నాడని యువీ చెప్పాడు.
కాగా, లక్నో సూపర్ జెయింట్స్ జట్టు నేడు ఉప్పల్ వేదికగా సన్రైజర్స్ హైదరాబాద్తో తలపడనుంది. ఈ మ్యాచ్లోనైనా పంత్ తిరిగి ఫామ్ అందుకుంటాడని అతని అభిమానులు ఆశిస్తున్నారు.
