జీ 5లో స్ట్రీమింగ్ దిశగా కంగనా 'తేజస్'

బాలీవుడ్ లో నాయిక ప్రధానమైన పాత్రలను పోషించే అతి తక్కువమంది కథానాయికలలో కంగనా రనౌత్ ఒకరు. ప్రధానమైన పాత్రధారిగా, సర్వేశ్ మేవారా 'తేజస్' సినిమాను రూపొందించాడు. భారీ బడ్జెట్ తో నిర్మితమైన ఈ సినిమా, అక్టోబర్ 27వ తేదీన భారీ స్థాయిలో థియేటర్లకు వచ్చింది. అయితే ఆశించిన స్థాయిలో ఈ సినిమా ప్రేక్షకుల ఆదరణ పొందలేకపోయింది.

అలాంటి ఈ సినిమా స్ట్రీమింగ్ హక్కులను జీ 5వారు దక్కించుకున్నారు. ఈ నెల 5వ తేదీ నుంచి ఈ సినిమాను విడుదల చేయనున్నట్టుగా ఒక పోస్టర్ ను వదిలారు. 2016లో భారత వైమానిక దళంలో మొదటిసారిగా మహిళలకు ప్రవేశాన్ని కల్పించిన సంఘటన ఆధారంగా ఈ సినిమాను రూపొందించారు.

భారతీయ వైమానిక దళానికి చెందిన మహిళా పైలట్ గా కంగనా రనౌత్ కనిపిస్తుంది. పాకిస్థాన్ కి సంబంధించిన ఒక సీక్రెట్ ఆపరేషన్ లో పాల్గొనే పైలట్ గా ఆమె పాత్ర కొనసాగుతుంది. కంగనా లుక్ .. ఆమె నటన ఈ సినిమాకి ప్రధానమైన ఆకర్షణగా నిలుస్తాయి. ఓటీటీ వైపు నుంచి ఈ సినిమా ఏ స్థాయిలో మెప్పిస్తుందనేది చూడాలి.