అనూ ఇమ్మాన్యుయేల్ తప్పుకోవడం గురించి రవితేజ!

రవితేజ కథానాయకుడిగా కల్యాణ్ కృష్ణ దర్శకత్వంలో 'నేల టిక్కెట్టు' సినిమా రూపొందింది. మాళవిక శర్మ కథానాయికగా నటించిన ఈ సినిమాను, ఈ నెల 25వ తేదీన విడుదల చేయనున్నారు. ఈ సందర్భంగా రవితేజ మాట్లాడుతూ .. ఈ సినిమాలో తాను ఓ అనాథ పాత్రలో కనిపిస్తానని చెప్పారు. లవ్ .. కామెడీ .. ఎమోషన్ కలయికగా వచ్చే ఈ సినిమా అన్నివర్గాల ప్రేక్షకులను ఆకట్టుకుంటుందని అన్నారు. మాస్ తో పాటు యూత్ ను .. ఫ్యామిలీ ఆడియన్స్ ను కూడా అలరిస్తుందని చెప్పారు.

రవితేజ నెక్స్ట్ ప్రాజెక్ట్ అయిన 'అమర్ అక్బర్ అంటోని' ప్రస్తావన ఇదే సమయంలో వచ్చింది. ఈ సినిమాలో నుంచి అనూ ఇమ్మాన్యుయేల్ తప్పుకోవడానికి కారణమేమిటనే ప్రశ్న ఆయనకి ఎదురైంది. అందుకు రవితేజ స్పందిస్తూ .. "అనూ ఇమ్మాన్యుయేల్ 'శైలజా రెడ్డి అల్లుడు' సినిమా కోసం ఎక్కువ డేట్స్ కేటాయించింది. అవే డేట్స్ లో 'అమర్ అక్బర్ ఆంటోని' సినిమా చేయవలసి వచ్చింది. ఇబ్బంది అవుతుందని భావించే ఆమె ఈ సినిమా నుంచి తప్పుకుంది. ఆమెతో తప్పకుండా త్వరలోనే ఒక సినిమా చేస్తాను" అని చెప్పుకొచ్చారు.