Srikanth: 'గేమ్ ఛేంజ‌ర్'లో అప్పన్న పాత్రను చరణ్ పోషించిన తీరు చూస్తే అంతా షాక్ అవుతారు: నటుడు శ్రీకాంత్
- రామ్‌చ‌ర‌ణ్, శంకర్ కాంబినేష‌న్‌లో 'గేమ్ ఛేంజ‌ర్'
- జ‌న‌వ‌రి 10న ప్రేక్ష‌కుల ముందుకు రానున్న సినిమా
- ప్ర‌చార కార్య‌క్ర‌మాలు ముమ్మ‌రం చేసిన చిత్ర బృందం
- తాజాగా ఈ మూవీ విశేషాలను మీడియాతో పంచుకున్న నటుడు శ్రీకాంత్
గ్లోబల్ స్టార్ రామ్ చరణ్ క‌థానాయ‌కుడిగా స్టార్ డైరెక్ట‌ర్ శంకర్ ద‌ర్శ‌క‌త్వంలో రూపొందిన భారీ బ‌డ్జెట్ చిత్రం ‘గేమ్ ఛేంజ‌ర్’. ఈ సినిమాను శ్రీమ‌తి అనిత స‌మ‌ర్ప‌ణ‌లో శ్రీవెంకటేశ్వర క్రియేషన్స్, జీ స్టూడియోస్, దిల్ రాజు ప్రొడక్షన్ బ్యానర్స్‌పై దిల్ రాజు, శిరీష్ భారీగా నిర్మించారు. తెలుగు, త‌మిళ, హిందీ భాష‌ల్లో ఈ మూవీ సంక్రాంతి కానుక‌గా 2025 జ‌న‌వ‌రి 10న ప్ర‌పంచ వ్యాప్తంగా విడుద‌ల కానుంది. ఈ క్రమంలో ‘గేమ్ ఛేంజ‌ర్’లో ముఖ్య పాత్ర పోషించిన నటుడు శ్రీకాంత్ మీడియాతో చిత్ర విశేషాలను పంచుకున్నారు. ఈ సంద‌ర్భంగా ఆయనకు అడిగిన ప‌లు ప్ర‌శ్న‌ల‌కు ఆస‌క్తిక‌ర స‌మాధానాలు చెప్పారు. ఆ విశేషాలను ఇప్పుడు మ‌నం తెలుసుకుందాం.
'గేమ్ ఛేంజ‌ర్'లో మీ పాత్ర ఎలా ఉండబోతోంది?
శంకర్ గారితో పని చేయాలని ప్రతీ ఒక్క ఆర్టిస్ట్‌కు ఉంటుంది. 'గేమ్ ఛేంజ‌ర్' కథ ఆయన ఫస్ట్ హాఫ్ చెప్పినప్పుడు ఈ పాత్రను నాకు ఎందుకు చెబుతున్నారా? అని అనుకున్నాను. సెకండాఫ్ చెప్పిన తరువాత ఈ పాత్రను కచ్చితంగా నేనే చేయాలని అనుకున్నాను. నా కారెక్టర్ అంత బాగా ఉంటుంది. గెటప్ కూడా చాలా కొత్తగా ఉంటుంది. ఈ ప్రోస్థటిక్ మేకప్‌కే నాలుగు గంటలు పట్టేది.
ప్రోస్థటిక్ మేకప్‌లో నటించడం ఎలా అనిపించింది?
నేను ఇంత వరకు ప్రోస్థటిక్ మేకప్ వేసుకుని నటించలేదు. కానీ అలాంటి మేకప్ ధరించి నటించడం చాలా కష్టం. చెమటలు పట్టినా మేకప్ మారిపోతుంది.
శంకర్ గారి వర్క్ ఎక్స్‌పీరియెన్స్ ఎలా ఉంది?
శంకర్ గారి పనితనం గురించి నేను కొత్తగా చెప్పాల్సిన పని లేదు. ఆయన చాలా సహనంతో ఉంటారు. అనుకున్నది అనుకున్నట్టు వచ్చే వరకు టేక్స్ తీసుకుంటూనే ఉంటారు. ప్రతీ కారెక్టర్‌ను ఆయన నటించి చూపిస్తారు.
'గేమ్ ఛేంజ‌ర్'లో మీ పాత్ర నెగెటివ్ షేడ్స్‌లో ఉంటుందా? పాజిటివ్‌గా ఉంటుందా?
నా పాత్రలో అన్ని రకాల ఎమోషన్స్ ఉంటాయి. చాలా సస్పెన్స్‌లు ఉంటాయి. అవన్నీ చెప్ప‌లేను. గెటప్ వేసిన వెంటనే ఆ కారెక్టర్ తాలుకా షేడ్స్ అన్నీ వచ్చేస్తాయి. నా పాత్ర చాలా కొత్తగా ఉంటుంది. సినిమాకు చాలా ముఖ్యమైన కారెక్టర్. ఇంత మంచి అవకాశం రావడం నా అదృష్టం.
ఎవరితో ఎక్కువ కాంబినేషన్ సీన్స్ ఉంటాయి?
ఎస్‌జే సూర్య, జయరాం, సముద్రఖని, రామ్ చరణ్ ఇలా అందరితోనూ సీన్లు ఉంటాయి. ఎస్‌జే సూర్య పాత్ర చాలా డిఫరెంట్‌గా ఉంటుంది. ఇంకా చెప్పాలంటే సరిపోదా శనివారం పాత్రను మించేలా ఉంటుంది.
గెటప్ చాలా కొత్తగా ఉంది కదా.. ఈ లుక్‌ను ఎలా ఫైనల్ చేశారు?
మా తండ్రి గారి గెటప్‌ను చూసే నాకు ఈ కారెక్టర్ లుక్‌ను ఫిక్స్ చేశారు. గెటప్ వేసుకుని నేరుగా ఇంటికి వెళ్లాను. మా అమ్మ నన్ను చూసి షాక్ అయ్యారు. హేయ్ బేబీ (నవ్వుతూ) అని సరదాగా పిలిచాను. అప్పుడు నా గెటప్ సరిగ్గా సెట్ అయిందని అనుకున్నాను.
రామ్ చరణ్‌తో కలిసి మళ్లీ వర్క్ చేశారు? అప్పటికీ ఇప్పటికీ తేడా ఏమైనా గమనించారా?
'గోవిందుడు అందరివాడేలే' చిత్రం టైంలో రామ్ చరణ్ చాలా యంగ్. ఇప్పుడు చాలా ఎదిగాడు. గ్లోబల్ స్థాయికి ఎదిగాడు. అప్పన్న పాత్రను రామ్ చరణ్ పోషించిన తీరు చూస్తే అంతా షాక్ అవుతారు. చాలా కొత్తగా అనిపిస్తాడు. రామ్ చరణ్ నన్ను ఎప్పుడూ అన్నా అని ఆప్యాయంగానే పిలుస్తాడు.
డిఫరెంట్ పాత్రలను ఎంచుకుంటున్నారు కదా.. ఆడియెన్స్ నుంచి ఎలాంటి రెస్పాన్స్ వస్తుందో అని భయపడుతుంటారా?
దేవర చిత్రంలోనూ డిఫరెంట్ పాత్రను పోషించా. అఖండ టైంలోనూ కాస్త భయపడ్డాను. ఆపరేషన్ దుర్యోధన చిత్రాన్ని రిసీవ్ చేసుకున్నారు. అప్పటి నుంచి నాకు కాస్త ధైర్యం ఏర్పడింది.
'గేమ్ ఛేంజ‌ర్' చిత్రం ఎలా ఉండబోతోంది?
ప్రస్తుతం ఎలివేషన్స్‌తో పాటు కథను చెబితే బాగా ఆదరిస్తున్నారు. కొన్ని చిత్రాలు ఎలివేషన్స్‌తోనే ఆడుతున్నాయి. ఈ చిత్రంలో కథతో పాటు ఎలివేషన్స్ ఉంటాయి. ఈ మధ్య శంకర్ తీసిన చిత్రాలు మిస్ ఫైర్ అయి ఉండొచ్చు. కానీ ఇది మాత్రం అస్సలు మిస్ ఫైర్ కాదు. ట్విస్టుల మీద ట్విస్టులు ఉంటాయి. శంకర్ ప్రతీ సినిమాల్లో ఉండేలానే ఇందులోనూ సామాజిక సందేశం ఉంటుంది.
'గేమ్ ఛేంజ‌ర్' చిత్రానికి సీక్వెల్ వంటివి ఏదైనా ఉంటుందా?
కార్తిక్ సుబ్బరాజ్ మంచి రచయిత. ఆయన రాసిన కథ శంకర్ గారికి చాలా నచ్చింది. అందుకే సినిమాను చేసేందుకు ముందుకు వచ్చారు. దిల్ రాజు కూడా ఖర్చుకి ఎక్కడా వెనుకాడలేదు. ఈ మూవీకి సీక్వెల్ వంటివి ఏమీ ఉండవు.
షూటింగ్ చాలా ఆలస్యంగా, నిదానంగా జరగడానికి కారణం ఏంటి?
అందరి డేట్లు స‌ర్దుబాటు కాక‌పోవ‌డం వల్లే షూటింగ్ ఆలస్యమైంది. దాదాపు ఏడాది వృధా అయింది. 'దేవర' షూటింగ్‌లో ఉన్నప్పుడు గేమ్ చేంజర్ కోసం అడిగారు. అలా అందరి డేట్లు సెట్ చేసుకుని షూటింగ్ చేసే సరికి ఆలస్యం అయింది.
రాబోవు చిత్రాలు, ఫ్యూచర్ ప్రాజెక్ట్స్ గురించి చెప్పండి?
రెగ్యులర్ ఫిల్మ్స్ కాకుండా డిఫరెంట్ పాత్రలను ఎంచుకుంటున్నాను. ప్రస్తుతం సాయి ధరమ్ తేజ్ సంబరాల ఏటి గట్టులో నటిస్తున్నాను. అలాగే కళ్యాణ్ రామ్ మూవీలో నటిస్తున్నాను. సుష్మిత గోల్డెన్ బాక్స్‌లో ఓ వెబ్ సిరీస్ చేస్తున్నాను.
రీ రిలీజ్‌ల గురించి, మీ కొడుకు చిత్రాల గురించి చెప్పండి?
ఖడ్గం రీ రిలీజ్‌ను థియేటర్లో చూశాను. కుర్రాళ్లంతా చాలా ఎంజాయ్ చేశారు. పెళ్లి సందడి చిత్రాన్ని రీ రిలీజ్ చేస్తే ఎలా ఉంటుందా? అని అనుకుంటున్నాను. నా కొడుకు రోషన్‌ ప్రస్తుతం ఛాంపియన్ చిత్రాన్ని చేస్తున్నాడు. మేం ఇద్దరం కలిసి ఇప్పట్లో అయితే నటించం. చిన్నోడు ఇప్పుడు పదో తరగతి చదువుతున్నాడు. చదువులు పూర్తయ్యాక సినిమాల్లోకి వస్తాడు.
