ఐపీఎల్ 2023 కప్పు కొట్టేదెవరో చెప్పిన డీ విలియర్స్ 

ఐపీఎల్ 2023 సీజన్ ఆసక్తికరంగా సాగుతోంది. ఈ సీజన్ లోనూ గుజరాత్ టైటాన్స్ జట్టు బలంగా కనిపిస్తోంది. గతేడాదే కొత్తగా అవతరించిన గుజరాత్ టైటాన్స్.. తొలి ఏడాదే కప్పును ఎగరేసుకుపోయింది. ఈ ఏడాది కప్పు ఎవరి వశం అవుతుందనే దానిపై అభిమానుల్లో భిన్న అంచనాలు నెలకొన్నాయి. తాము నచ్చే జట్టు విజేతగా నిలవాలని చాలా మంది కోరుకుంటూ ఉంటారు. కానీ, ఓ సగటు అభిమాని కంటే, ఒక క్రికెటర్ విజేతను కచ్చితంగా అంచనా వేయగలడు. ఆర్సీబీ జట్టు మాజీ ఆటగాడు ఏబీ డీ విలియర్స్ ఇదే విషయమై తన అంచనాలను ఓ టీవీ చానల్ తో పంచుకున్నాడు.

‘‘చాలా కాలం క్రితం ఐపీఎల్ వేలం సమయంలోనే గుజరాత్ జట్టు విజేతగా నిలుస్తుందని చెప్పా. ఆర్సీబీ గెలవాలని నాకు ఉన్నప్పటికీ, గతంలో చెప్పిన దానికే నేను కట్టుబడి ఉంటా. ఆ జట్టు (గుజరాత్) గొప్పది. ఎంతో సమతూకంతో ఉంది. వారి దగ్గర కావాల్సినన్ని సామర్థ్యాలు ఉన్నాయి’’ అని డీ విలియర్స్ అన్నాడు. విరాట్ కోహ్లీలో పెద్ద మార్పు తానేమీ చూడడం లేదంటూ, అతడి టెక్నిక్ ఇప్పటికీ బలంగా ఉందన్నాడు.