ఈ నెల 22న ధమ్కీ ఇచ్చేందుకు విష్వక్సేన్ రెడీ

హీరోగానే కాకుండా తనలోని దర్శకత్వ ప్రతిభను నిరూపించుకున్న నటుడు విష్వక్సేన్. ఫలక్ నుమా దాస్ చిత్రంతో కెరీర్ ఆరంభంలోనే మెగా ఫోన్ పట్టుకొని మెప్పించాడు. ఆ తర్వాత నటుడిగా పలు విజయాలు సొంతం చేసుకున్న విష్వక్సేన్.. ఇప్పుడు స్వీయ దర్శకత్వంలో ‘దాస్ కా ధమ్కీ’ చిత్రం చేస్తున్నాడు. ఇప్పటికే విడుదల చేసిన పోస్టర్స్, పాటలకు మంచి స్పందన వచ్చింది. తాజా చిత్రం విడుదల తేదీని వెల్లడిస్తూ మరో కొత్త పోస్టర్ వదిలాడు విష్వక్సేన్. ఈ నెల 22న  ప్రపంచ వ్యాప్తంగా తెలుగు, తమిళ, మలయాళ, కన్నడ, హిందీ భాషల్లో విడుదల కానుంది. 

కామెడీ యాక్షన్‌ డ్రామా నేపథ్యంలో తెరకెక్కుతున్న ఈ సినిమాలో నివేదా పేతురాజ్ హీరోయిన్ గా నటిస్తోంది. రావు రమేశ్, పృథ్విరాజ్‌, హైపర్‌ ఆది కీలక పాత్రలు పోషిస్తున్నారు. ఈ చిత్రానికి ప్రసన్నకుమార్ బెజవాడ కథ అందించారు. లియోన్‌ జేమ్స్ ఈ చిత్రానికి సంగీతం అందిస్తున్నాడు. వన్మయి క్రియేషన్స్‌, విష్వక్సేన్  సినిమాస్‌ బ్యానర్లు ఈ చిత్రాన్ని సంయుక్తంగా తెరకెక్కిస్తున్నాయి.