'ఆదిపురుష్' విడుదల తేదీ వాయిదా.. కొత్త రిలీజ్ డేట్ ఇదే!

పాన్ ఇండియా స్టార్ ప్రభాస్ అభిమానులకు మరోసారి నిరాశ ఎదురైంది. భారీ బడ్జెట్ తో తెరకెక్కిన ఈ చిత్రం విడుదల వాయిదా పడింది. షెడ్యూల్ ప్రకారం ఈ చిత్రం జనవరి 12న విడుదల కావాల్సి ఉంది. అయితే, వీఎఫ్ఎక్స్ లో తప్పులను సరిచేయాలని యూనిట్ నిర్ణయించింది. దీనికి చాలా సమయం పట్టనుండటంతో రిలీజ్ ని వాయిదా వేసింది. వచ్చే ఏడాది జూన్ 16న విడుదల చేస్తున్నట్టు ప్రకటించింది. ఈ విషయాన్ని దర్శకుడు ఓం రౌత్ ట్విట్టర్ ద్వారా వెల్లడించారు. 

''ఆదిపురుష్' అనేది కేవలం సినిమానే కాదు. శ్రీరామచంద్ర ప్రభువుపై మనకున్న భక్తి... మన చరిత్ర, సంస్కృతిపై మనకున్న నిబద్ధతకు నిదర్శనం. ప్రేక్షకులకు పూర్తి స్థాయిలో విజువల్ ట్రీట్ ఇవ్వడం కోసం... ఈ సినిమా కోసం పని చేస్తున్న టీములకు మరికొంత సమయం ఇవ్వాల్సి వస్తోంది. వచ్చే ఏడాది జూన్ 16న ఈ సినిమా థియేటర్లలోకి వస్తుంది' అని ట్వీట్ చేశారు. 

ఈ చిత్రం కోసం ఇప్పటికే దాదాపు రూ. 300 కోట్లను వెచ్చించినట్టు సమాచారం. ఇప్పుడు మరో రూ. 100 కోట్లతో వీఎఫ్ఎక్స్ షాట్స్ ను సరి చేయనున్నట్టు తెలుస్తోంది. ఈ చిత్రంలో రాముడిగా ప్రభాస్, సీతగా కృతి సనన్, రావణుడిగా సైఫ్ అలీ ఖాన్ నటిస్తున్నారు.