వావ్.. .ఈ రోజంతా అభినందనలే!: రానా

భీమ్లా నాయక్ బ్లాక్ బస్టర్ హిట్ కావడంతో నటుడు రానా దగ్గుబాటి ఆనందోత్సాహాల్లో తేలిపోతున్నాడు. పవన్ కల్యాణ్ భీమ్లా నాయక్ గా నటించిన ఈ చిత్రంలో రానా డేనియల్ శేఖర్ గా కనిపించాడు. ఎక్కడ చూసినా పాజిటివ్ రివ్యూలే దర్శనమిస్తున్నాయి. పవన్ కల్యాణ్, రానాల నటనకు జేజేలు పలుకుతున్నారు.

ఈ నేపథ్యంలో, రానా సోషల్ మీడియాలో స్పందించాడు. "వావ్... ఇవాళ అంతా అభినందనలు వెల్లువెత్తాయి. అభిమానులకు, ప్రేక్షకులకు నా హృదయపూర్వకంగా కృతజ్ఞతలు తెలుపుకుంటున్నాను. నాకు ఈ చిత్రంలో నటించే అవకాశం ఇచ్చిన సితార ఎంటర్టయిన్ మెంట్స్ సంస్థకు, వంశీ, చినబాబు గారు, మాటల మాంత్రికుడు త్రివిక్రమ్, అద్భుతమైన కథానాయకుడు పవన్ కల్యాణ్ గారికి కృతజ్ఞతలు" అంటూ రానా ట్వీట్ చేశారు.