శ్రీకాంత్ అడ్డాలకి బాలయ్య గ్రీన్ సిగ్నల్!

'అఖండ' సినిమాతో బాలకృష్ణ భారీ విజయాన్ని సొంతం చేసుకున్నారు. 103 థియేటర్లలో ఈ సినిమా 50 రోజులను పూర్తిచేసుకోవడం విశేషం. ఆ తరువాత సినిమాను గోపీచంద్ మలినేని దర్శకత్వంలో చేయడానికి ఆయన రెడీ అవుతున్నారు. ఈ సినిమా తరువాత కొరటాల .. అనిల్ రావిపూడి లైన్లో ఉన్నట్టుగా వార్తలు వినిపిస్తున్నాయి.

ఈ నేపథ్యంలోనే బాలకృష్ణను దర్శకుడు శ్రీకాంత్ అడ్డాల కలిసి ఒక కథ చెప్పాడనీ, ఆ కథ నచ్చడంతో ఆయన గ్రీన్ సిగ్నల్ ఇచ్చారని తెలుస్తోంది. ఈ సినిమాకి దిల్ రాజు నిర్మాతగా వ్యవహరించనున్నారు. ఈ కథ బాలయ్యబాబుకి బాగుంటుందని చెప్పి ఆయన దగ్గరికి శ్రీకాంత్ అడ్డాలను పంపించినదే దిల్ రాజు అని చెబుతున్నారు.

అసలు దర్శకుడిగా శ్రీకాంత్ అడ్డాల ప్రయాణం మొదలైందే దిల్ రాజు నిర్మించిన 'కొత్త బంగారు లోకం'తో. ఆ తరువాత ఇద్దరి కాంబినేషన్లో వచ్చిన 'సీతమ్మవాకిట్లో సిరిమల్లె చెట్టు' కూడా హిట్ కొట్టేసింది. ఇక ఇప్పుడు బాలకృష్ణను లైన్లో పెట్టేశారు. అయితే ఈ ప్రాజెక్టు ఎప్పుడు పట్టాలపైకి వెళుతుందనే విషయంలోనే మాత్రం క్లారిటీ రావలసి ఉంది.