Narappa: నానీతో ఒక్క సీన్ అయినా చేయాలనుందట!
- 'కేరాఫ్ కంచెరపాలెం'తో గుర్తింపు
- అదే బాటలో 'అర్థ శతాబ్దం'
- 'నారప్ప'తో పెరిగిన క్రేజ్
ఇప్పుడు ఎక్కడ చూసినా కార్తీక్ రత్నం పేరు వినిపిస్తోంది. మొదటి నుంచి కూడా కార్తీక్ రత్నం విభిన్నమైన .. విలక్షణమైన పాత్రలను ఎంచుకుంటూ వస్తున్నాడు. ముఖ్యంగా గ్రామీణ నేపథ్యంలో రూపొందే సినిమాల కోసం ఆయనను తీసుకుంటున్నారు. ఆ తరహా పాత్రలు ఆయనకు బాగా నప్పుతుండటమే అందుకు కారణం.
కార్తీక్ రత్నం అనగానే 'కేరాఫ్ కంచరపాలెం' సినిమా గుర్తుకు వస్తుంది. ఆ సినిమా హిట్ కావడమే కాకుండా, ఆయనకి మంచి ఇమేజ్ ను తెచ్చిపెట్టింది. ఇటీవల వచ్చిన 'అర్థ శతాబ్దం' కూడా ఆయనకి మంచి పేరును తెచ్చిపెట్టింది. ఈ రెండు సినిమాల వల్లనే ఆయనకు 'నారప్ప' సినిమాలో అవకాశం వచ్చింది.
ఈ సినిమాలో ఆయన వెంకటేశ్ పెద్దకొడుకు 'మునికన్న' పాత్రలో మెప్పించాడు. కథ అంతా కూడా ఆయన పాత్ర చుట్టూ తిరగడం వలన ఒక్క సారిగా క్రేజ్ పెరిగిపోయింది. తాజా ఇంటర్వ్యూలో ఆయన మాట్లాడుతూ , "నాని గారి నటన అంటే నాకు చాలా ఇష్టం .. ఆయనతో కలిసి ఒక్క సీన్ చేసినా చాలు" అన్నాడు. మరి ఆ ఛాన్స్ ఎప్పుడు వస్తుందో చూడాలి.
