డౌట్ లేదు .. సంక్రాంతికే 'హరిహర వీరమల్లు'

పవన్ కల్యాణ్ కథానాయకుడిగా ప్రస్తుతం రెండు సినిమాలు రూపొందుతున్నాయి. ఒకటి సాగర్.కె చంద్ర దర్శకత్వంలో అయితే, మరొకటి క్రిష్ దర్శకత్వంలో. చారిత్రక నేపథ్యంలో సాగే కథను ఎంచుకున్న క్రిష్, ఇటీవలే ఈ సినిమాకి 'హరిహర వీరమల్లు' అనే టైటిల్ ను ఖాయం చేశాడు. ఈ టైటిల్ కి మంచి రెస్పాన్స్ వచ్చింది. వజ్రాల దొంగగా పవన్ కనిపించనున్న ఈ సినిమాకి, ఎ.ఎమ్.రత్నం నిర్మాతగా వ్యవహరిస్తున్నాడు. ఈ సినిమాను సంక్రాంతికి విడుదల చేయనున్నట్టుగా చెప్పారు.

అయితే కరోనా కారణంగా చాలా సినిమాల షూటింగులు వాయిదాపడ్డాయి. అలాగే విడుదల తేదీలను కూడా వాయిదా వేసుకుంటున్నాయి. ఈ నేపథ్యంలో 'హరిహర వీరమల్లు' కూడా సంక్రాంతికి రాకపోవచ్చనే ఒక టాక్ వినిపిస్తోంది. ఈ విషయంపై ఎ.ఎమ్.రత్నం స్పందిస్తూ .. " సంక్రాంతికి ఇంకా చాలా సమయం ఉంది .. ఇక క్రిష్ తాను అనుకున్న సమయానికంటే ముందుగానే షూటింగు పూర్తి చేసే దర్శకుడు. అందువలన 'హరిహర వీరమల్లు' విడుదలను వాయిదా వేసే పరిస్థితి రాదు. సంక్రాంతికి ఈ సినిమా థియేటర్లలో ఉంటుంది" అని చెప్పుకొచ్చారు.