తనపై శ్రీనివాసన్ ఆగ్రహం వ్యక్తం చేయడంపై సురేశ్ రైనా స్పందన!
- యూఏఈ నుంచి వెనక్కి వచ్చిన రైనా
- విజయగర్వం నెత్తికెక్కిందన్న శ్రీనివాసన్
- శ్రీనివాసన్ తనకు తండ్రి సమానులన్న రైనా
ఐపీఎల్ కోసం క్వారంటైన్ సమయంలో కూడా తాను ప్రాక్టీస్ చేశానని.. యూఏఈలో తనను మళ్లీ చూసే అవకాశం ఉందని రైనా చెప్పాడు. రైనా అర్థాంతరంగా ఇండియాకు వచ్చిన వెంటనే... అతనికి, సీఎస్కే యజమాని, బీసీసీఐ మాజీ అధ్యక్షుడు శ్రీనివాసన్ కు మధ్య విభేదాలు తలెత్తాయనే వార్తలు ప్రచారమైన సంగతి తెలిసిందే. దానికి తోడు రైనాకు విజయగర్వం నెత్తికెక్కిందంటూ శ్రీనివాసన్ చేసిన కామెంట్ కూడా చర్చనీయాంశమైంది.
దీనిపై రైనా స్పందిస్తూ, ఆ వార్తల్లో నిజం లేదని స్పష్టం చేశాడు. శ్రీనివాసన్ తనకు తండ్రి సమానులని... ఆయన కూడా తనను చిన్న కొడుకు మాదిరి చూసుకున్నారని చెప్పాడు. తాను ఎందుకు ఇండియాకు వచ్చాననే కారణం శ్రీనివాసన్ కు తెలియదని అన్నాడు. తన గురించి శ్రీనివాసన్ ఆగ్రహం వ్యక్తం చేయడంపై స్పందిస్తూ... కొడుకుని తండ్రి మందలించడం సాధారణ విషయమని చెప్పాడు.
