తరుణ్‌ భాస్కర్‌ 'ఈ న‌గ‌రానికి ఏమైంది' ట్రైలర్‌ విడుదల

'పెళ్లిచూపులు' సినిమా దర్శకుడు తరుణ్ భాస్కర్‌ దర్శకత్వంలో సురేష్ ప్రొడ‌క్ష‌న్స్ నిర్మిస్తున్న 'ఈ న‌గ‌రానికి ఏమైంది' చిత్రం ట్రైలర్‌ ఈరోజు విడుదలైంది. 'నీ గ్యాంగ్‌తో థియేట‌ర్‌కు రా చూసుకుందాం' అనే ఆసక్తికర ఉప శీర్షికతో ఈ సినిమా విడుదలకు సిద్ధమవుతోంది. ఈ ట్రైలర్‌లో హైదరాబాద్ యాసతో కూడిన డైలాగ్‌లు అలరిస్తున్నాయి. నలుగురు స్నేహితుల మధ్య జరిగే కథగా ఈ సినిమా ఉండనుంది. యూత్‌ఫుల్‌ ఎంటర్‌టైన్‌మెంట్‌గా రూపుదిద్దుకుంటోన్న ఈ సినిమాకు వివేక్‌ సాగర్‌ సంగీతమందిస్తున్నారు.

'మనం కూడా ఈ సాయంత్రం మధ్యపానంలో మునిగి తేలాల్సిందే' అంటూ ఈ ట్రైలర్‌లో ఓ డైలాగ్‌ వదిలారు. అలాగే, 'ఈరోజు ఆఫీస్‌కి ఎందుకుపోలే' అని ఒకరు అడగగా, 'నాగుల పంచమి ఇయ్యాల' అని ఓ నటుడు సమాధానం ఇస్తున్నాడు.

ఈ సినిమా ట్రైలర్‌పై సినీనటుడు నాని స్పందిస్తూ... ఈ మధ్యకాలంలో తాను చూసిన ట్రైలర్‌లలో చాలా సహజంగా, ఫన్‌గా ఉన్న ట్రైలర్‌ ఇదేనని అన్నాడు. ఈ సినిమా పెద్ద విజయాన్ని సాధించాలని కోరుకుంటున్నట్లు ట్వీట్‌ చేశాడు.