టీ, కాఫీలు బాగా తాగుతారా? అయితే, వాటివల్ల లాభ నష్టాలు ఏమిటో చూడండి!

భారతీయుల ఆహారపు అలవాట్లలో టీ, కాఫీలకు ప్రముఖ స్థానం ఉంది. రోజుకు ఒక్కసారి తాగే వారి నుంచి రోజుకు లెక్కకు మిక్కిలిగా తాగే వారి వరకు అనేక మందికి ఈ పానీయం తాగకపోతే ఏదో వెలితిగా ఉంటుంది. అయితే, టీ, కాఫీలతో లాభాలతో పాటు నష్టాలు కూడా ఉన్నాయని, పరిమితంగా తీసుకోకపోతే వాటితో ప్రతికూల ప్రభావం తప్పదని నిపుణులు చెబుతున్నారు.

ఈ నేపథ్యంలో తేనీరు సేవించడం వల్ల కలిగే లాభాలేంటో చూస్తే..

• టీలో ఉండే యాంటీ ఆక్సిడెంట్స్ శరీరంలోని చెడు కొలెస్ట్రాల్ (ఎల్డీఎల్)ను తగ్గిస్తాయి. కొవ్వు పదార్థాలైన ట్రైగ్లిజరైడ్స్ ను కొంతమేర తగ్గిస్తాయి.
• కొవ్వు పదార్థాలను కొంత మేర తగ్గిస్తుంది కాబట్టి, పక్షవాతాన్ని కూడా కొంతవరకు నిరోధించగలదు. పక్షవాతాన్ని నివారించే గుణం గ్రీన్ టీలో మరింత ఎక్కువట.
• రక్తనాళాల్లోని లోపలి పొర ఎండోథీలియంలో రక్తం సాఫీగా ప్రసరణ జరిగేందుకు టీ తోడ్పడుతుంది. అందుకే కొంతమేర బ్రెయిన్ స్ట్రోక్ ను తగ్గిస్తుందట.
• అయితే, టీ కారణంగా కలిగే ప్రయోజనాలు అందుకోవాలంటే అప్పటికప్పుడు కాచిన టీనే తాగాలి. అందులో ఉండే కాటేచిన్, ఫ్లేవనాయిడ్స్ తాజా టీలోనే అధికంగా ఉంటాయి. సమయం గడిచే కొద్దీ అవి తగ్గిపోతూ ఉంటాయి.

టీ వల్ల కలిగే నష్టాలు!

• ఆహారం, కూరగాయలు, పండ్ల నుంచి శరీరానికి అందాల్సిన ఐరన్ ను శరీరం శోషింపచేసుకోవడంలో టీ ప్రతిబంధకంగా మారుతుంది.
• సుదీర్ఘకాలం పాటు టీ ఎక్కువగా తాగేవారిలో ఫ్లోరోసిస్ రావొచ్చట.

కాఫీతో లాభాలు

• కాఫీ అంటే ఉత్తేజానికి మారుపేరు అని చెబుతారు. అందులో వందల కొద్దీ జీవరసాయనాలు ఉంటాయి. అందుకే కాఫీ తాగగానే శరీర స్థితిలో స్వల్ప మార్పు కనిపిస్తుంది.
• కాఫీలో మైగ్రేన్ తలనొప్పి నుంచి ఉపశమనం కలిగించే ఔషధగుణాలున్న పదార్థం ఉంటుంది.

కాఫీతో నష్టాలు!

• హైబీపీతో బాధపడేవారు కాఫీ విషయంలో జాగ్రత్తగా ఉండాలి. కాఫీ తాగిన కాసేపట్లోనే బీపీలో పెరుగుదల కనిపిస్తుంది. కనీసం గంట సేపైనా ఈ ప్రభావం ఉంటుందట.
• కాఫీ యాంగ్జైటీ పెరుగుదలకు కారణమవుతుంది. తద్వారా శరీరంలో కొన్నిసార్లు వణుకు కనిపిస్తుంది.
• రోజుకు రెండు కప్పుల కంటే ఎక్కువ తాగేవారిలో గ్లకోమా అనే కంటి సంబంధ జబ్బు వచ్చే అవకాశముంటుంది.