'లగాన్' చిత్రంలో నాకూ ఓ పాత్ర ఉంది.. ఆసక్తికర విషయం చెప్పిన సచిన్
- 'లగాన్' చిత్రానికి 25 ఏళ్లు పూర్తి కావడంతో పాత జ్ఞాపకాలు పంచుకున్న సచిన్
- సినిమాలోని క్రికెట్ ప్రేక్షకుల అరుపుల సౌండ్ కోసం తానే సాయం చేశానని వెల్లడి
- తన కుమారుడు అర్జున్ రోజూ 'లగాన్' చూసేవాడని గుర్తుచేసుకున్న మాస్టర్
- ఏఆర్ రెహమాన్ సంగీతం.. ముఖ్యంగా 'ఓ పాలన్హారే' పాట అద్భుతమని ప్రశంస
- ఆమిర్ ఖాన్, అశుతోశ్ గోవారికర్తో పాటు చిత్ర బృందానికి శుభాకాంక్షలు
దర్శకుడు అశుతోశ్ గోవారికర్తో తన సంభాషణను గుర్తుచేసుకుంటూ.. "సినిమా విడుదలకు రెండేళ్ల ముందు అశుతోశ్ నన్ను కలిశారు. క్రికెట్ మ్యాచ్లో ప్రేక్షకుల అరుపులు, కోలాహలం సహజంగా ఉండే సౌండ్ ఎక్కడ దొరుకుతుందని అడిగారు. అప్పుడు ముంబై వాంఖడే స్టేడియంలో మేం ఆస్ట్రేలియాతో ఆడుతున్నాం. వెంటనే 'ఎక్కడికో వెళ్లడం ఎందుకు... వాంఖడే స్టేడియానికి వచ్చి రికార్డ్ చేసుకో' అని నేను చెప్పాను" అంటూ ఆనాటి జ్ఞాపకాలను సచిన్ పంచుకున్నాడు.
ఈ సినిమా తన కుటుంబంలో ఎలా భాగమైపోయిందో కూడా సచిన్ వివరించాడు. తన కుమారుడు అర్జున్ టెండూల్కర్ ప్రతీరోజూ సాయంత్రం స్నేహితులతో క్రికెట్ ఆడి ఇంటికి వచ్చాక, డిన్నర్ చేస్తూ టీవీలో 'లగాన్' సినిమా పెట్టేవాడని, ఒక్కరోజు కూడా మిస్సవకుండా ఆ
సినిమా చూసేవాడని తెలిపాడు. కుటుంబమంతా కలిసి ఎన్నిసార్లు చూసినా ఈ సినిమా ఎప్పుడూ కొత్తగానే అనిపించేదని సచిన్ అన్నాడు.
ఏఆర్ రెహమాన్ అందించిన సంగీతం గురించి మాట్లాడుతూ, ముఖ్యంగా 'ఓ పాలన్హారే' పాట తనకు ప్రశాంతతను, సానుకూల దృక్పథాన్ని ఇస్తుందని ప్రశంసించాడు. 25 ఏళ్లు ఎంత వేగంగా గడిచిపోయాయోనని ఆశ్చర్యం వ్యక్తం చేస్తూ, ఈ అద్భుతమైన చిత్రాన్ని అందించిన ఆమిర్ ఖాన్, అశుతోశ్ గోవారికర్, ఇతర చిత్ర బృందానికి సచిన్ అభినందనలు తెలిపాడు.
2001లో విడుదలైన 'లగాన్: వన్స్ అపాన్ ఎ టైమ్ ఇన్ ఇండియా' చిత్రానికి అశుతోశ్ గోవారికర్ దర్శకత్వం వహించగా, ఆమిర్ ఖాన్ ప్రధాన పాత్రలో నటించి, నిర్మించారు. 1893 నేపథ్యంలో సాగే ఈ కథలో తమ గ్రామాన్ని పన్నుల భారం నుంచి కాపాడుకోవడానికి భువన్ అనే రైతు బ్రిటిష్ అధికారులతో క్రికెట్ మ్యాచ్కు సిద్ధపడతాడు. ఈ చిత్రం 74వ అకాడమీ అవార్డులలో ఉత్తమ విదేశీ భాషా చిత్రంగా నామినేషన్ పొంది, ఈ ఘనత సాధించిన మూడో భారతీయ చిత్రంగా చరిత్ర సృష్టించింది.
వీడియో కోసం ఇక్కడ క్లిక్ చేయండి
